«Елдің өткенін білгің келсе қарттарына, болашағын білгің келсе жастарына қара» деген қанатты сөз бар. Қазақ үшін жасы үлкен адамның қашан да орны төрде, қадірі биік болған. Себебі, бүгінгі тепсе темір үзетін жігіт ертең қария болатыны анық. Айдай сұлу қыздардың да уақыт өте ажарын әжім басқан әже болары белгілі. Сондықтан да көнекөздерімізді құрметтеп, қадіріне жету – басты міндет. Соған сай жуырда Есік қаласындағы «Esik grand hall» мейрамханасында қарттар мерекесі аталып өтті. Аудандық шараға ауылдардағы ақсақалдар алқасы мен аналар кеңесінің төрағалары, саналы ғұмырын елге арнаған еңбек ардагерлері жиналды.
Берекелі дастархан басындағы басқосуда алғашқы құттықтау сөз аудан әкімі Талғат Байеділовке берілді. Аудан әкімі қарттардың қоғамдағы орнына кеңінен тоқталды:
– Қарттарымызға қандай жақсы сөз айтсақ та өте жарасымды. Ұрпақтар сабақтастығында сіздердің қосып жатқан үлестеріңіз зор. Сіздердің өмір жолдарыңыз, ел мен жерге сіңірген еңбектеріңіз біз үшін баға жетпес құндылық. Тәуелсіздік алған жылдан бері де еліміздің әлеуметтік-экономикалық, мәдениеті мен спор-тының, руханиятымыздың дамуына қосқан үлестеріңізді ұмытуға хақымыз жоқ. Бүгінгі таңда бейнеттің зейнетін көріп жүрсеңіздер де, халықтың ынтымағын, этносаралық татулықты сақтауда өлшеусіз үлес қосудан жаңылмай келесіздер. Ел ертеңіне асқан алаңдаушылық-пен көңілдеріңізді бөліп, қоғаммен етене араласып, барлық қоғамдық шараларға белсене қатысып жүргендеріңіз үшін мың алғыс. Жасаған қызметтеріңіз бен қалдырған іздеріңіз ешқашан өшпейді – дей келе жүрекжарды тілегін жеткізді.
Талғат Ескендірұлының құттықтау сөзі аяқ-талған соң, мереке төрінде елдегі тыныштық пен ырыс құтты сақтап жүрген қазыналы қарттарға аудан әкімінің марапаттары табысталды.
Жиынға қатысқан ұлықты үлкендердің арасынан Өмірғали Кенжебеков, Елеусіз Сұлтан-ғазиев, Ильян Жакеев, Шаяхмет Құсайынов, Гүлнар Жошыбаева, Мираш Нұраханқызы сынды бірнеше еңбек ардагерлері мерекеге сай ақ тілектерін білдірді.
Сондай-ақ аудандық мәдениет үйінің қызмет-керлері әуезді әндерін, көркем билерін арнап, мерекеге сән қосты.
Ринат НАРХАНОВ.
