Мемлекет басшысы Қасым-Жомарт Тоқаев 2025 жылды «Жұмысшы мамандықтары жылы» деп жариялады. Әрі техникалық және кәсіби білім беру жүйесін реформалау қажеттігін айтты. Президент тапсырмасына сәйкес, Алматы облысының әкімі Марат Сұлтанғазиев жұмыс сапарымен Еңбекшіқазақ ауданында болып, ондағы Шелек политехникалық колледжінің базасын аралады. Оқу орнының басшылығымен және оның әлеуметтік серіктестерімен кездесті.
Іргесі сонау 1956 жылы қаланған Шелек политехникалық колледжі – Алматы облысында орналасқан техникалық және кәсіптік білім беретін 40 мекеменің бірі де, бірегейі. Бастапқыда ауданның колхоздарын механизаторлық кадрлармен қамтамасыз ету үшін Малыбай ауылында механизаторлар мектебі болып құрылған. Кейін бірнеше рет кәсіптік-техникалық училище, кәсіптік мектеп, кәсіптік лицей болып өзгерді. Ал 2013 жылдан бастап Шелек политехникалық колледжі ретінде мамандарды даярлап келеді. Жетпіс жылға жуық терең тарихы мен теңдессіз тәжірибесі бар оқу орны еліміздің білім беру саласында өзіндік орынға ие. Мұнда жоғары кәсіби және шығармашылық әлеуеті зор педагогикалық ұжым қалыптасқан.
Колледж жалпы 630 орынға шақталған екі оқу корпусынан тұрады. Онда оқу кабинеттерінен бөлек, акт залы, спорт залы, асхана, емхана пункті орналасқан. Сондай-ақ оқу-өндірістік шеберханалары мен 240 орындық жатақханасы да бар. Бүгінде колледж қабырғасында білім алып жатқан 431 студенттің алыс ауылдар мен шет аудандардан келетін 90-ы жатақханаға орналасқан. Жатақханада тұру да, оқу орнындағы білім де тегін. Сонымен қатар студенттер 40 мың теңгеге жуық шәкіртақы алады. Қазіргі уақытта оқу орны тамақтандыруды ұйымдастыру, дәнекерлеу ісі, автомобиль көлігіне техникалық қызмет көрсету, жөндеу және пайдалану бойынша алты түрлі маман дайындайды.
Бәсекеге қабілетті білікті мамандарды дайындау ісінде тек теория ғана емес, практика да үлкен маңызға ие екені сөзсіз. Оқығанын іс жүзінде байқап көру үшін болашақ кәсіп иелері оқу-өндірістік шеберханаларда көп уақытын өткізеді. Осы орайда өңір басшысы колледждің заман талабына сай жабдықталған шеберханаларын аралап көріп, ондағы материалдық-техникалық базаның жай-жапсарымен танысты. Оқу-өндірістік шеберлері шет елден алынған әр техниканың тілін түсіндіріп, олардың қай кәсіпті үйрену үшін қандай маңызы барын жан-жақты баяндады.
Іссапар барысында өңір басшысы Шелек политехникалық колледжінің әлеуметтік серіктесі – «Жетісу Вольфрам» ЖШС өкілдерімен кездесіп, оқу орны мен серіктестік арасындағы жұмыстар жайы талқыланды. Еңбекшіқазақ ауданының Сөгеті ауылдық округіне қарасты аумақтағы Бұғыты тауларында вольфрам кенін байыту және қайта өңдеу бойынша жүзеге асырылатын бұл ірі инвестициялық жоба басшыларымен былтыр кездескенде де Марат Елеусізұлы жергілікті жердің халқын жұмыспен қамту мақсатында тау-кен байыту комбинатында жұмыс істейтін жергілікті тұрғындардың арасынан мамандар дайындау қажеттігін ескерткен еді. Бұл жолы да оның маңызына ерекше тоқталды. Қазіргі уақытта 3 айлық курстармен 19 жұмысшы маман, оның ішінде дәнекерлеуші, электромонтерлер колледж базасында білімін жетілдірген. Екі жыл бұрын «Жетісу Вольфрам» ЖШС мен Шелек политехникалық колледжі арасында меморандум жасалған. Соның нәтижесінде колледжде жаңа мамандықтар ашылу мүмкіндіктері де бар. Кәсіпорын базасында колледждің студенттері өндірістік-тәжірибеден өте алады. Осы жылдың қаңтар айынан бастап «Жетісу Вольфрам» ЖШС-ның тапсырысы бойынша колледж жұмысшы мамандарын дайындау ісіне кіріседі. Колледж директоры Қуат Дүйсебаев, колледж әкімшілігі және дәнекерлеуші, электромонтер мамандықтарында оқып жатқан студенттер «Жетісу Вольфрам» ЖШС тау-кен байыту кәсіпорнында экскурсияда болып, болашақ жұмыс орындарымен танысып қайтқан. «Басты мақсатымыз – қоғамда үлкен сұранысқа ие кәсіби білікті маман дайындау және түлектеріміз бірден жұмысқа орналаса алуы үшін әлеуметтік серіктестермен тығыз байланыста жұмыс істеу. Бүгінде өңіріміздегі ірі инвестициялық жоба – «Жетісу Вольфрам» ЖШС-нан бөлек, 33 әлеуметтік серіктеспен қарым-қатынастамыз. Студенттеріміз онда тәжірибеден өтіп қана қоймай, тұрақты жұмысқа да қабылданып жатыр. Мысалы, биыл оқуын аяқтайтын 120 студенттің 30 пайызы жоғарыда айтып өткен «Жетісу Вольфрам» ЖШС-сында маман ретінде жұмысын жалғастырмақ», – дейді колледж директоры Қуат Дүйсебаев.
Алматы облысы қарқынды дамып келе жатқан ірі өндірістік өңірлер қатарында. Ендеше, бұл бағытта белгілі биікке жету үшін де түрлі салада кәсіби мықты мамандар керегі сөзсіз. Өз ісін жақсы білетін жұмысшы мамандарға қашан да сұраныс жоғары. Осы тұрғыда кәсіптік-техникалық білімі бар жұмысшы мамандықтар дайындайтын Шелек политехникалық колледжі өзіндік маңызға ие.
Құралай МҰРАТҚЫЗЫ.
«Алатау арайы».
Суреттерді түсірген:
Аслан ҚАЖЕКЕ.
