Жер-Ана бусанып, бәйшешек бүр жарып, күн мен түн теңеліп, айнала жаңарып, тіршілік жанданып, кеуделерге сан арман мен қуаныш ұялататын жыл басы – әз-Наурыз мерекесі де қазақ даласына төрлетті. Қанымызға сіңген дәстүріміз, жанымызда жаңғырған ұлттық мерекеміздің тылсым табиғатпен мінсіз байланысы, ғибратты әрекет пен амалға толы ғұрпы сиқырлы сезім мен шаттыққа бөлейтіні сөзсіз. Осынау ғажайыпқа толы ұлық мейрам жылдағы үрдіс бойынша Т.Молдағалиев атындағы аудандық мәдениет үйінің алаңында «Наурыз-Думан» атты тақырыппен ауқымды түрде аталып өтті. Салтанатты мереке
Қазақстан халқы Ассамблеясының 30 жылдығы және ауданымыздың тумасы, әйгілі ақын
Тұманбай Молдағалиевтің 90 жылдық мерейтойын да қамтыды.
Мәдениет үйінің алаңына білім ордаларының, бөлімдердің, Ассамблея өкілдерінің киіз үйлері мен шатырлары тігіліп, тұрғындар мен қала қонақтарына барынша қонақ-жайлық танытып, наурыз көже мен ұлттық дәмдерін аяған жоқ. Наурыз тойлауға келген арқа-жарқа, мәре-сәре күйдегі халықта есеп болған жоқ. Ауданымыздағы музейлердің, қолөнер шеберлерінің көрмелері де ұйымдастырылды. Алаңның келесі бөлігінде ұлттық спорт түрлерінен жарыстар ұйымдастырылып, дүбірлі мерекенің қызығы арта түсті. Аудан әкімі Талғат Байеділов, аудандық мәслихат төрағасы Бекет Ахметов бастаған құрметті қонақ өкілдері ең әуелі поэзия әлемінің алып тұлғасы Тұманбай Молдағалиевтің ескерткішіне гүл шоқтарын қойып, ақынның рухына тағзым етті.
Белгіленген уақытта «Наурыз-Думан» мерекесінің салтанатты, сахналық кезеңі де бастауын алды. Т.Молда-ғалиев атындағы «Жастар» драма театры және Қаракемер балалар театры әртістерінің қатысуымен «Ақ бура» қойылымы қойылды. Қойылымда Ақ бура түйеге мінген Қыдыр ата халыққа ақ батасын беріп, Ұмай анамыздың да бейнесі сомдалды. Халықтық ұлт аспаптар оркестрінің сүйемелдеуімен, хор ұжымы мен «Улыбка» би ансамблінің қатысуымен өткен Біржан Сара операсы да көпшіліктің қошеметіне бөленді.
Өз кезегінде құттықтау сөз алған аудан әкімі Талғат Ескендірұлы барша аудан тұрғындарын мерекемен құттықтады:
– Тарихы терең, тағылымы мол әз-Наурыз – жаңашылдық пен жасампаз рухтың жаршысы, адам мен табиғат арасындағы үндестіктің, келі-сім мен татулықтың алтын арқауы. Мемлекет басшысы Қасым-Жомарт Тоқаевтың бастамасымен бұл мереке өткен жылдан бастап Наурызнама тұжырымдамасы аясында жаңа форматта, он күн бойы аталып өтуде. Осы Наурызнамаға сәйкес, бүгін «Жыл ба-сы» күнін мерекелеудеміз! Жыл басы жаңа мүмкіндіктер мен мақсаттарға жету үшін өркендеу жолын айқындайтын уақыт. Наурыз тойын кең көлемде мерекелеу – ұлттық құндылықты арттырып, бірлігімізді нығайтатыны сөзсіз. Мемлекет басшысы Ұлттық құрылтайдың төртінші отырысында бірқатар өзекті мә-селелерге тоқталды. Тәрбиесіз берілген білім – адамзаттың қас жауы екендігін ескере отырып, балалар тәрбиесінің «Адал азамат» тұжырымдамасын жүзеге асырудың маңыздылығын айтып өтті. Ел ертеңі үшін бұл бағытта барлығымыз игі істің басында болып, жұмыла жұмыс істеуіміз маңызды. «Ынтымаққа бақ қонады, бейбіт елге береке кіреді» дегендей, ендігі біздің міндетіміз – барымызды бағалап, бірлігімізді нығайту, Отанымызды одан ары өркендету. Өңір халқының мызғымас бірлігі мен берекелі тірлігінің арқасында Еңбекшіқазақ ауданы да күн санап көркеюде, – дей келе биылғы жыл Президентіміздің тапсырмасымен «Жұмысшы мамандықтар жылы» деп танылғанын тілге тиек етіп, Ұлы Жеңістің 80 жылдық, Қазақстан халқы Ассамблеясының 30 жылдық мерекелеріне орай елеулі шаралар кеңінен өткізілетінін мәлімдеді. Сонымен қатар, Абай Құнанбаевтың 180, Нұрғиса Тілендиевтің 100, Тұманбай Молдағалиевтің 90 жылдық мерейтойлары да аталып өтетінін жеткізді. «Таза Қазақстан» бағдарламасы да басты назарда болатынын айта келе Ұлыстың ұлы күніне сай көпшілікке ақ тілегін арнады.
Аудан әкімі өз баяндамасынан соң, Тұманбай Молдағалиевтің асыл жары Күлтай Қасымованы сахна төріне шақырып, сый-құрметін көрсетті.
Мереке барысында Күрд этно-мәдени бірлестігінің төрағасы Надо Азизович ынтымаққа ұйысып, бірліктің байрағаын құлатпай, татулықты тұғырынан түсірмеген Қазақ еліне барлық этностың алғысы шексіз екенін тілге тиек етіп, Наурыз тойына ізгі тілегін білдірді. Сондай-ақ, ауданымыздың құр-меттті азаматы, еңбек ардагері Елеусіз Сұлтанғазиев, аудандық ардагерлер кеңесінің төрағасы Тілеулес Ұзақов, аудандық аналар кеңесінің төрайымы Роза Исатаева, жастар ресурстық орта-лығының жетекшісі Қымбат Әділқызы арнайы сөз алып, мерекелік тілектерін, әз-Наурыз хақында ұлттық құндылықтарымызға негізделген орамды ойларымен бөлісті.
Сәні мен салтанаты, мәні мен мағынасы жарасқан мерекенің екінші бөлімі Қазақстан халқы асамблеясының 30 жылдығының құрметіне орай ұйғыр, түрік этностарының ұлттық ән, билеріне кезек берілді, өзге ұлттардың қазақ шаңырағына ұйысуы бейнеленген әсем туынды тамашаланды. Мереке концерт-тік бағдарламамен жалғасын тапты. Ауданымыздың айшықты өнерпаздары мен бірқатар эстрада жұлдыздары әсем әндерін әуелетті.
Ринат НАРХАНОВ.
