Әрбір ұлттың болмысында ғасырлар бойы бабадан балаға мирас болып келе жатқан адамгершілік қағидаттары ұлттық құндылықтары болып саналады. Сан ғасырлардан жалғасып келе жатқан халықтың қазынасы – тілі, ділі, салт-дәстүрі, әдебиеті мен өнері. Ал осы құндылықтарды танып білудің қайнар көзі – кітап екені даусыз. Осыны ескерген елімізде ауылдардағы жабылып қалған кітапханалар қайта ашылуда.

Президентіміз Қасым-Жомарт Тоқаев Ұлттық құрылтайдың үшінші отырысында: «Кітапхана – мемлекеттің, ұлттың негізгі жады. Еліміз үшін құнды тарихи деректермен материалдардың дені кітапханада сақталады. Ақыл-ойдың ордасы,  қоғамда орны айрықша рухани ордамыздың ортасы кітапхана», – деп атап айтқандай, озық ойлы ұлт болудың ең төте жолы кітап оқып, көңілге тоқу.

Жуырда ізгі бастаманың жалғасындай болып, Асы ауылының мәдениет үйінен қайта ашылған кітапханада  «Ұлттық құндылық – ұлт қазынасы» атты  аудандық семинар өтті. Семинардың мақсаты – мамандардың өзара тәжірибе алмасуына, ұлттық құндылық-тарды насихаттауға үлес қосу. Оның тәрбие-дегі, білім берудегі рөлі, салт-дәстүр мен ұлттық болмыстың қазіргі қоғамдағы маңызы туралы өзекті мәселелер туралы сөз  қозғалды.

Семинарға қатысқан аудандық кітапхананың әдіскері Гүлия Саурықова және Асы ауылдық округі әкімінің орынбасары Еламан Әжібек сөз сөйлеп, семинардың мақсаты мен тәрбиелік маңызы жайлы қысқаша мәлімет берді.  Кітапханашылардың озық  істері ортаға  салынып, өзара тәжірибе алмасты.

Семинардың келесі кезеңі ұлттық құндылықтар көрмесін таныстырумен жалғасты. Асысаға ауылының кітапханашысы Еркежан Тергенбаева ауылдың  атақты бүркітші Алдаберген марқұмның ұлы Медет Шалиповты келген қонақтарға таныстырды. Құсбегі Медет Алдабергенұлы бүркітті қолға үйрету мен баптау туралы толыққанды мәлімет берді.  Ал Шелек тарихи-өлкетану музейінің  «Ұлттық құндылықтар – тәрбиенің түп қазығы»  атты тақырыпта  жылжымалы көрмесін қор сақшысы Қуанәлі Алмасбек таныстырып, тұрмыстық заттардың тарихымен маңыздылығы туралы айтып берді.

Шара барысында ауылдық мәдениет үйінің қызметкерлері мен өнерлі жастарының концерттік бағдарламасы көпшілік назарына ұсынылды.

Анарбек МӨКІШҰЛЫ.