Елімізде маусым айының үшінші жексенбісі – медицина саласындағы қызметкерлердің кәсіби мерекесі. Ақ халатты абзал жанның жұмысының ауырлығы, әр ісінің жауапкершілікке толы екені анық. Сол себепті де адам жанының арашасы бола білген дәрігерлердің құрметі биік болуға тиісті. Соған сай мереке қарсаңында аудандық Т.Молдағалиев атындағы мәдениет үйінде «Ақ халатты абзал жандарға алғыс» атты мерекелік кеш өтті.  

Мерекелік кештің құттықтау сөзін алған аудан әкімінің орынбасары Ертай Сұлтанәліұлы:

– Медицина қызметкерлерінің күні – ден-саулық сақтау саласында қызмет жасайтын жандардың ғана мерекесі емес, бұл – бүкілхалықтық мейрам. Өйткені, әр адам үшін оның денсаулығы мен өмірінен артық құндылық жоқ. «Медицина кәсібі – адамгершіліктің асылы» дейді ұлы ойшылдар. Адам өмірін ұзартуға септігін тигізіп, ажалдан арашалаушы дәрігер мамандығын халқымыз ежелден қастерлеп, құрметтеген.

Бүгінгі таңда қазақстандықтардың денсаулығын жақсарту – мемлекеттік саясаттың басым бағыттарының бірі. Елімізде денсаулық саласын дамыту, тұрғындарға заман талабына сай, қолжетімді және сапалы медициналық қызмет көрсету жолында бар мүмкін-діктер жасалуда.

Ауданымызда да денсаулық сақтау жүйесі үнемі нығайтылып келеді. Салаға бөлінетін қаржы да жылдан жылға артып, аудандағы емдеу мекемелерінің материалдық-техникалық базасы да жаңартылуда.

Ауданымыздың медицина саласында 83 медициналық ұйым халыққа қызмет көрсетеді, оның ішінде – Енбекшіқазақ көпбейінді орталық аудандық ауруханасы, Үздік тәжірибелер орталығы (ҮТО), Шелек ауылының № 1 аудандық ауруханасы, Алғашқы медициналық-санитариялық көмек орталығы, 47 ауылдық дәрігерлік амбулатория, 26 фельдшерлік-акушерлік пункттер, оның ішінде медициналық пункттер, Бәйдібек би ауылының оңалту және ерте араласу орталығы, 5 жекеменшік медицина ұйымдары, Аудандық сани-тариялық-эпидемиологиялық бақылау басқармасы – дей келе, қиын да күрделі мамандықты кәсіп еткен ақ халатты абзал жандардың табанды еңбегі мен ерік-жігерін сөзіне арқау етіп, жүрекжарды тілегін білдірді.

Ертай Сұлтанәліұлы құттықтау сөзін тәмамдап, мерекелік марапаттарды табыстады. Әуелі Болат Рысбайұлы, Тынымбике  Гельманқызы бастаған бір-қатар медицина саласының ардагер-леріне сый құрмет көрсетілді. Сонымен қатар, өз кәсібінде жемісті еңбек нәтижесінде үздік деп танылған медицина қызметкерлері аудан әкімі Талғат Ескендірұлының «Құрмет» грамотасы және алғыс хаттарымен марапатталды.

Мерекелік кеш мәдениет саласының қызметкерлері әзірлеген концерттік бағдарламаға ұласты. «Улыбка» би ансамблінің көркем биі, Біржан Бәзіл-жан, Сандуғаш Мубарак, Ләлә Бақыт-нұрқызы, Алма Қызыр, Жасқанат Қызыр, Нұртас Қайратұлы сынды талант иелері әсем әндерді әуелетті.