Қонаев қаласында кәсіби мереке — Ветеринария күніне арналған салтанатты жиын өтті. Іс-шара Алматы облысы әкімдігінің қолдауымен ұйымдастырылды. Шараны облыстық Ветеринария басқармасы, ҚР Ауыл шаруашылығы министрлігі Ветеринариялық бақылау және қадағалау комитетінің Алматы облыстық аумақтық инспекциясы, сондай-ақ Облыстық ветеринариялық станция бірлесе ұйымдастырды.
Еске салайық, 2023 жылдан бастап Ветеринария күні ресми кәсіби мерекелер күнтізбесіне енгізіліп, жыл сайын 10 шілдеде атап өтіледі. Бұл күн – күнделікті еңбегімен жануарлар денсаулығын қамтамасыз етіп, соның арқасында халықтың санитарлық қауіпсіздігіне үлес қосып жүрген ветеринар мамандардың еңбегіне деген қоғамның алғысы мен құрметінің белгісі.
Салтанатты жиында ветеринария саласында жоғары нәтижелерге қол жеткізген үздік қызметкерлер марапатталды. Сонымен қатар, Алматы облысы әкімінің орынбасары 14 жаңа қызметтік автокөліктің кілтін табыстады. Бұл көліктер аудандық ветеринариялық бөлімшелердің қажеттіліктеріне арналған. Жалпы техниканың құны – 104 миллион теңгені құрады. Жаңа автокөліктер шалғай ауылдық округтерде жұмыс істейтін мамандардың мобильділігі мен жұмыс тиімділігін арттыруға сеп болмақ.
Алматы облысы әкімінің орынбасары Бақытұлы Бақытнұр өз сөзінде:
«Бүгінгі мереке – күнделікті ерен еңбегі көп жағдайда көзге көрінбейтін, бірақ стратегиялық маңызы бар мамандарға шынайы алғыс білдіру мүмкіндігі. Ветеринария жүйесінің мықты болуы – бұл жануарлар денсаулығы ғана емес, еліміздің азық-түлік қауіпсіздігінің кепілі. Мемлекет саланың материалдық-техникалық базасын нығайтуды одан әрі жалғастырады», — деп атап өтті.
Мерекелік бағдарлама аясында саланың ардагерлеріне құрмет көрсетіліп, өнер ұжымдарының концерттік қойылымдары мен заманауи ветеринариялық жабдықтар мен бұйымдардың көрмесі ұйымдастырылды. Қатысушылар жаңа технологиялармен танысып, тәжірибе алмасып, саланың өзекті мәселелерін талқылады.
Мұндай іс-шаралар ветеринария саласындағы кәсіби қауымдастықты нығайтып, мамандықтың беделін көтеруге және оның қоғамдағы маңызын арттыруға зор үлес қосады. Ветеринария күні – бұл мереке ғана емес, сонымен қатар жануарлар мен қоғам денсаулығын қорғап жүрген жандарға деген құрметтің көрінісі.
