Жуырда аудандық қоғамдық кеңестің кезекті отырысы өтті. Маңызды жиынды аудандық қоғамдық кеңестің төрағасы Серік Надырбаев жүргізіп, қатысушыларды күн тәртібімен таныстырды. Отырыстың басты мақсаты – ауданның әлеуметтік-экономикалық даму барысын талқылап, алдағы кезеңге жоспарланған жұмыстар мен қаржылық бағыттардың ашықтығын қамтамасыз ету.

Күн тәртібіндегі негізгі мәселе бойынша аудандық экономика және қаржы бөлімінің басшысы Бейбіт Искаков баяндама жасады. Ол өз сөзінде ауданымыздың 2025 жылы атқарған жұмыстарына кеңінен тоқталып, әлеуметтік сала, инфрақұрылым, ауыл шаруашылығы және кәсіпкерлікті қолдау бағыттарында жүзеге асқан бірқатар маңызды жобаларды атап өтті. Сонымен қатар, аудан бюджетінің орындалу барысы, бюджет қаражатының тиімді игерілуі мен мемлекеттік бағдарламалар аясында атқарылған жұмыстар жөнінде нақты мәліметтер келтірді.

Баяндамашы 2026 жылға жоспарланған бюджеттік есепке де жеке тоқталып, алдағы жылы жүзеге асырылатын басым бағыттарды таныстырды. Атап айтқанда, әлеуметтік нысандарды жөндеу, жол инфрақұрылымын жақсарту, ауылдық елді мекендерді абаттандыру және халықтың әл-ауқатын арттыруға бағытталған жобаларға басымдық берілетіні айтылды. Бұл бастамалар аудан тұрғындарының өмір сүру сапасын арттыруға және өңірдің тұрақты дамуын қамтамасыз етуге бағытталған.

Жиын барысында қоғамдық кеңес мүшелері баяндамаға қатысты өз пікірлерін білдіріп, халықты толғандырып жүрген өзекті мәселелер бойынша сұрақтарын қойды. Сонымен қатар, ауданның әлеуметтік-экономикалық дамуын одан әрі жетілдіру мақсатында бірқатар ұсыныстар айтылды

Отырысты қорытындылаған қоғамдық кеңес төрағасы Серік Дүйсебайұлы көтерілген мәселелердің маңыздылығына тоқталып, қоғамдық бақылаудың күшейтілуі мен ашықтық қағидаттарын сақтау қажеттігін атап өтті. Ол алдағы уақытта да осындай кездесулер арқылы халық пен билік арасындағы өзара байланысты нығайту маңызды екенін жеткізді.

Ринат НАРХАНОВ.