Алланың  маған  берген  ерекше  дарыны  мені  шығармашылыққа ерте  жастан жетеледі.  Бала күнімнен кітап оқуға, ойымды қағаз бетіне түсіруге құштар болдым.  8 жасымда алғашқы өлеңімді жазсам, 12-13 жасымда ертегі жазуға деген қызығушылығым оянды. Қазіргі таңда менің 4 толыққанды ертегім мен 20-30-ға жуық өлеңім бар. Сол шығармаларымның кейбірі баспасөз беттерінде жарияланып, оқырман жүрегінен орын тапты.

Шығармашылық мен үшін тек әуестік емес, жан дүниемнің тынысы, өзімді танытудың, ойым мен сезімімді жеткізудің бір жолы. Өмір жолында әр адам әртүрлі сынақтарға тап болады. Сол сынақтар мені мойытпай, керісінше, рухани тұрғыда шыңдап, білімге, ізденіске жетеледі. Табандылық пен еңбек – менің өмірлік ұстанымым.

Қазақ тілі мен әдебиетіне деген сүйіспеншілігім – шығармашылығымның басты тірегі. Қазіргі жаһандану дәуірінде ұлттық құндылықтардың маңызы әлсіреп бара жатқандай. Жаңа технологиялар мен әлеуметтік желілер жастардың кітап оқуға деген ынтасын төмендетіп, ана тілімізді екінші орынға ысырып жатқаны жасырын емес. Бұл жағдай мені бейжай қалдырмайды.

Осы ойлар менің болашақ мамандығымды таңдауыма себеп болды. Мен қазақ тілі мен әдебиетінің дамуына үлес қосып, оның қадір-қасиетін жас ұрпақ санасына сіңіруді мақсат етемін. Ұлттың болашағы – рухани бай, тілін қадірлей білетін саналы ұрпақ деп білемін.

Арманым – қазақ әдебиетін әлемге танытып, руханият жолында еңбек ететін тұлға болу. Мен үшін бұл асқақ арман табандылық пен білім арқылы қол жеткізетін нақты мақсат.

Айзере ЕРКІНҚЫЗЫ,

Р.Тоқатаев атындағы орта мектептің 11 сынып оқушысы.