Биыл қазақ елі данышпан, ойшыл Абай Құнанбайұлының 180 жылдығын жоғары деңгейде атап өтті. Осы мерейтойдың аясында еліміздің барлық аймағында, білім, мәдениет ошақтарында мыңдаған танымды шаралар атқарылды. Жуырда    В. Терешкова атындағы орта мектебінде Абай Құнанбайұлының өмірі мен шығармашылығына арналған «Ұлы халықтың ұлы Абайы» атты әдеби-сазды кеш өтті. Бұл шараның мақсаты – қазақтың бас ақыны, ұлы дана, ойшыл, сазгер Абай Құнанбаевтың мол мұрасын насихаттау. Оқушының бойына ақыл мен парасатты, сөз құдіреті мен көркем сөздің мәйегін ұғындыру. Ұлыларымызды құрметтеу, сол арқылы оқушы бойына мақтаныш сезімін тудыру, даналардың даралығын бағалау, қастерлей білуге баулу.

Танымдық кеште ұлы данышпанның ғұмырынан сыр шертетін қысқаша видео көрсетілді. Мектеп оқушылары Абай Құнанбайұлының  өлеңдері мен қара сөздерін, аудармаларын және поэма үзінділерін жатқа оқып, өнерлерін паш етті. Сонымен қатар, «Желсіз түнде жарық ай», «Көзімнің қарасы» әндері орындалды. Абайдың өмірі мен шығармашылығына арналған сұрақтар қойылды. Кеште ұлы ақынның өнегелі өмірі, даналығы  кеңінен таныстырылып, рухани асыл мұралары насихатталды.

Адамзаттық деңгейде өлмейтін мұрасын қалдырған ұлы Абай қазақ елімен бірге мәңгі жасай бермек. Абайды тануға ұмтылу – әрбір саналы жанның міндеті.

     Нұрғайша ОРАЗБЕКҚЫЗЫ,

қазақ тілі мен әдебиет пәнінің мұғалімі.