Қазақстанның дарынды оқушылары «UCMAS International Competition 2025 & World Cup 2025» халықаралық турнирінде жоғары нәтиже көрсетіп, еліміздің абыройын халықаралық аренада асқақтатты.
Аталған зияткерлік жарыс 2025 жылдың 6-7 желтоқсан күндері Грузия мемлекетінің Тбилиси қаласында, SEU University Georgia базасында өтті. Әлемнің 30-дан астам елінен келген үздік оқушылар қатысқан бұл додада Қазақстан құрамасы ерекше көзге түсті.
Халықаралық деңгейде ел намысын Астана, Алматы, Шымкент, Талдықорған, Қызылорда және Есік қалаларынан келген Халықаралық зияткерлік даму академиясының шәкірттері қорғады. Қатысушылар ауызша есептеу әдістемесін жоғары деңгейде меңгергенін дәлелдеп, Қазақстан қоржынына 8 алтын медаль, сондай-ақ күміс және қола жүлделерді салды.
Аталған жетістіктердің қатарында Еңбекшіқазақ ауданының да үлесі зор. Аудан намысын қорғаған жас өрендер Жаңашар ауылы, Т.Рысқұлов атындағы орта мектебінің өрендері Аяна Сәлім II орын иеленсе, Айсана Сәлім III орынды еншілеп, аудан абыройын асқақтатты.
Бұл жеңіс – тек балалардың жеке жетістігі ғана емес, сонымен қатар ата-ананың қолдауы мен ұстаз еңбегінің нәтижесі. Осы орайда шәкірттерін табандылықпен дайындап, білім мен тәрбие беруде аянбай еңбек етіп жүрген менталды арифметика пәнінің мұғалімі Жанат Рамазанқызының үлесі орасан. Ұстаздың кәсіби шеберлігі мен жанашырлығы жас дарындардың биік белестерді бағындыруына зор ықпал етті.
Жас чемпиондар өз жеңістерін Қазақстан Республикасының Тәуелсіздік күніне арнады. Бұл – олардың елге деген сүйіспеншілігі мен отаншылдық рухының айқын көрінісі.
Еңбекшіқазақ ауданының атын әлемдік деңгейде танытқан жас дарындарға, олардың ата-аналары мен ұстаздарына алдағы уақытта да толағай табыстар тілейміз. Білімді ұрпақ – ел болашағы!
Ринат НАРХАНОВ.
