Пандемияға байланысты әлемнің түкпір-түкпірінде карантин жарияланып, елдің көпшілігі үйінде отыр. Осыған орай соңғы 2-3 айда тұрмыстық зорлық-зомбылықтың көбейгені, жер-жерде ажырасуға өтініш білдіріп жатқандар саны артқаны да айтылып келеді. Сондай-ақ көп адамның ішімдікке салынып, депрессияға түсіп кеткені туралы мәлімет те аз емес.
Психологтардың айтуынша, қазіргі жағдайда халықтың көпшілігінің күйзеліске түсіп жатқанына түсіністік танытуға болады. Оның бірінші себебі, көпшілік бұрынғы, үйреншікті тірлігінен аяқасты карантиндік режимге топ ете қалды. Яғни карантинге дейін күнделікті жұмысына барып-келіп, қыдырып, ойнап-күліп еркін жүрсе, қазір үйден шықпауы керек. Мұндай күн тәртібі жұмыс істеп үйренген жандарға қамауда қалғанмен бірдей. Төрт қабырғаға қамалып, еркінен айырылғандай күй кешкен ел, әрине, күйзеліске түседі.
Ертеңгі күнін ойлап, азық-түліктің жетпей қалуынан қорқып, ауруды уайымдап, негатив ойға терең шомып кететін жандар да депрессияға бейім болады. Мұнай жағдайда олар бойындағы үрейді еселеп үлкейтіп, қорқыныштың құрсауында қалай қалғандарын да түсінбейді. Осылайша жүйкесі сыр беріп, ашуланшақтық, енжарлық, немқұрайлық, селқостық пайда болады.
Сонымен қатар жыл мезгілінің де адам денсаулығына әсері көп. Дәл көктем кезінде түрлі аурулардың қозып, жанға батуы да жүйкеге тиеді.
Мұндай қиын жағдайда қалмас үшін карантинді өз пайдаңызға шешуге тырысыңыз. Мәселен, карантин – шектеу емес, ол өзіңізге берілген мүмкіндік деп қараңыз. Иә, мұндай мүмкіндіктің сізде көптен бері болмағанына бәстесуге дайынмын. Сіз соңғы рет қашан отбасыңызбен бірге осынша көп уақыт өткізіп едіңіз?
Жауап беруге қиналып тұрсыз ғой? Ендеше, осы күніңізге шүкір деңіз. Бала-шағаңыздың жанында ойнап-күліп, аман-есен отырудан артық не бар? Осы күндерді мейлінше көтеріңкі көңіл күймен, қуанышта өткізуге тырысыңыз. Балаларыңызды құшырлана сүйіп, мейіріміңізді сездіріңіз. Ақыл-кеңесіңізді айтып, білгеніңізбен бөлісіңіз. Жарыңызбен, ата-анаңызбен, аға-бауырыңызбен отырып, сыр ақтарып, бір-біріңізді жақыннан тани түсіңіздер. Иә, бір әкеден туып, бір шаңырақта тұрғанымызбен кейде бір-бірімізді түсіне алмай немесе ішіміздегімен бөлісе алмай жататынымыз бар. Бұған себеп те көп. Оның бірі – уақыттың тапшылығы. Ал дәл қазір сол уақыт сізде бар. Оны тиімді пайдаланыңыз. Бұл дүниеде әрқайсымызға берілген ең үлкен қазына – уақыт пен отбасымыз болса, карантин кезінде осы екеуі де өз «қолымызда» тұр. Үлкен мүмкіндікті бос жібермеңіз.
Отбасы мен қызмет деп шапқылап жүріп, өзімізді ұмытып кетіп жатамыз. Иә, өзге емес, өзімізді. Карантин уақытында осы олқылықтың орнын толтыруға болады. Шығармашылықты шыңдаңыз. Сүйікті ісіңізбен айналысыңыз. Кішкентайыңыздан бейнелеу өнеріне қызыққаныңызбен, тіршіліктің қамымен қолыңызға қашан қылқалам алғаныңызды да ұмытқан боларсыз. Немесе тоқыма тоқуға, бисерден әдемі алқа жасауға, сүйікті тағамыңызды пісіруге, темірден түйін түйіп, зергерлікпен айналысуға уақыт таппай жүрген шығарсыз. Ендеше, кірісіңіз. Жан қалауымен жасалған істің қайыры көп, әрі тапсырыспен дайындағаннан әлдеқайда әдемі шығатынын да ұмытпаңыз. Бұл ісіңіз алдағы уақытта сізге қомақты табыс әкелетін кіріс көзіне айналуы да мүмкін ғой.
Хоббиді кіріс көзіне айналдыру туралы ойым ұнап жатса, өзіңізді жан-жақты дамытуды қолға алыңыз. Сүйікті ісіңізді пысықтап, қыр-сырын зерттеңіз. Ол үшін түрлі әдебиеттер оқып, интернет әлемінен өзіңізге қажетті ақпаратпен сусындаңыз. Түрлі онлайн тренингтер мен курстарға қатысып, машығыңызды арттырыңыз. Көздің майын тауысып, елдің не киіп, не ішкенін қарап, интернетте бос дүниеге уақыт өткізбей, пайдалы мәлімет іздеңіз. Қажетіңізге жаратыңыз, жаңа іс бастаңыз.
Сырт келбетіңізге көңіл бөліңіз, жаттығулар жасап, сымбатыңызды қолға алыңыз. Бетіне маска жасауға уақыт таппай жүрген қыз-келіншектер көп екенін жақсы білемін. Солардың қатарынан болсаңыз, уақытты тиімді пайдаланыңыз. Масканың түр-түрін байқап көруіңізге болады.
Ауданымыздағы көпшілік жер үйде тұрады. Демек, екінің бірінде кішігірім болса да, бау-бақшасы бар. Ал қазір көктем мезгілі екенін ескерсек, сол бау-бақшада жұмыстың нағыз қызған кезі екенін де білеміз. Қолыңызға күрек, тырмаңызды алып, кірісіңіз. Еңбегіңіздің өнбегі болады.
Ал мұның бәрін тындырып тастасаңыз, отырып ойланып көріңізші. Әрқайсымыздың әлдеқашан бастауын бастап, аяқтай алмай қалған шаруаларымыз шаш етектен. Біріміздің бастап қойған кітабымыз уақыттың жоқтығынан келесі беті ашылмай тұр. Енді біріміздің ойластырып, орындай алмай жүрген ісіміз қаншама. Соларды шетінен қолға алыңыз.
Әр нәрсенің оң қырын көре білсеңіз, депрессия емес, даму жолына түсетініңіз есіңізде болсын, оқырман.
Құралай МҰРАТҚЫЗЫ
