Күні кеше өткен жалпыхалықтық іс-шара, Ата Заңымызға енгізілген өзгерістер, жаңа Қазақстанды құру аясында атқарылған жұмыстар жөнінде халықтың пікірін білу мақсатында ауданымыздың құрметті азаматы, жазушылар одағының мүшесі, ақын, жазушы Шаяхмет Құсайыновпен, «Алтын адам» аналар ансамбілінің әншісі, зейнеткер Кулян Мадияровамен және Айдана Ертуған, Индира Сүлейменова, Бекарыс Мырзағұлов, Ади Абасали, Альфия Қуаныш, Аружан Үмбеталиева сияқты белсенді жастармен әңгіме-сұхбат жүргізіліп, 5 маусымда өткен референдумға деген көзқарастары төңірегінде пікірлерін тыңдаған едік. Олар өз сөзінде ҚР Конституциясына жасалып жатқан өзгерістер жаңа бетбұрыстың бастауы екенін айтты. Қонақтардың пікірінше, Мемлекет басшысы Қасым-Жомарт Тоқаев қоғамда оң өзгерістер жасау, халқымызға жарқын болашақ сыйлау жолында бар күш-жігерін сарп етіп келеді. Енді міне, жұртшылықтың талабын орындап, «халық үніне құлақ асатын мемлекет» қалыптастырып жатыр. Ел болашағына, келешек тағдырына қатысты өзгерістер осылай, яғни халықтың тікелей қатысуы арқылы шешіледі.
– Президенттің халық пікіріне құлақ асып, Конституцияға өзгерістер мен толықтырулар енгізу үшін референдум жариялауын дер кезінде қолға алынған қажетті бастама деп түсінеміз, – деп ой қорытты қонақтар.
Балауса Шарғынова.
