Мен, Кускеев Нурбек Серікұлы Алматы облысы Еңбекшіқазақ ауданында 1984 жылы 10 қазанда дүниеге келдім. Білімім жоғары, Алматы құрылыс және басқару менеджментін бітіргенмін. Еңбек жолымды «Сәкен Нарыновтың шеберханасы» мекемесінде сәулетші болып бастадым. Қазіргі уақытта ТОО «Есік сәулетте» басшылық қызметін атқарып келемін.

Отбасылымын, 5 балам бар.

Құрметті жерлестер!

Еліміздің болашағына тікелей әсер ететін үлкен саяси науқаннан бәріңіз хабардарсыздар. Президентіміз Қасым-Жомарт Кемелұлы Тоқаевтың әлеуметтік-экономикалық бағыттарда ұсынған тың бастамаларын іске асыру үшін елге берген уәдесін орындай білетін, халқына адал азаматтарды таңдау қажет. Жаңа Қазақстан құру үшін аталған белестен өту де оңай еместігі анық. Осы шақта ауызбіршілігімізді танытып, 19 наурызда өтетін сайлауға белсене қатысуларыңызды өтінемін. «Жері бай мемлекетіміздің елі де бай болса екен» деген менің де ізгі арманым бар. Ол үшін игі бастамаларды іске асыру жолында әрбір отандасымыздың міндет-борышы бар деп білемін.

Халық қалаулысы болу – зор жауапкершілік жүктейді. Елдің сеніміне ие болу және сол сенімді ақтау – орасан зор еңбектенуді, әрбір сайлаушының пікіріне құлақ асып, округтің әлеуметтік-экономикалық дамуына атсалысу деп білемін. Депутаттың негізгі мақсаты – өз округі мен қаласының мәселелерін жетік білу, оны аудандық мәслихат отырыстарында көтере білу және оның шешілуіне тиісті қаржының бөлінуіне ықпал ету. Бұл бағытта белсене жұмыс істеп, сайлаушыларымның сенімінен шығуға тырысамын. «Елге қызмет – ерге міндет» дегендей халықтың сенімінен шыға білсем, алдағы депутаттық мерзімге төмендегідей бағдарламамды ұсынамын.

Құрметті сайлаушылар!

–  Елді мекендерді ауызсумен қамтамасыз ету мәселесін шешуге ықпал ету;

– Елді мекендердегі ауызсу құбырларын жөндеу және оны иелікке өткізу мәселесін алға тарту;

– Ауылдарды абаттандыру, жарықтандыру, көркейту-көгалдандыру жұмыстарына тиісті деңгейде қаржы бөлінуін назарда ұстауға, зейнеткерлер мен ардагерлердің, аналар мен балалардың, мүгедектердің, тұрмысы төмен отбасылардың мұң-мұқтаждықтарын тиісті органдарға жеткізіп, оң шешімін табуын жүзеге асыруға;

– Елді мекендердің инфрақұрылымын дамытуға үлес қосу;

– Экономикалық және әлеуметтік бағдарламалардың орындалуын бақылау;

– Ауданымыздағы әлеуметік объектілердің емханалар, ауруханалар, мектептер мен балабақша, спорт алаңдарының материалдық жағдайын жақсартуға ықпал ету;

– Жаңа әлеуметтік объектілердің ашылуына ықпал ету;

– Жас мамандардың ауылға келуіне жағдай жасау, түрлі мемлекеттік бағдарламалардың кедергісіз іске асуына ықпал ету;

– Ұлттық бірыңғай тестілеуге дайындайтын ұстаздардың және өзге де жас мамандардың біліктілігін арттыруға кеңінен жол ашу;

– Демеушілік жолымен тұрмысы төмен, көпбалалы отбасы, ата-ана қамқорлығынан айырылған балаларға оқу жылы барысында материалдық көмек көрсетуді қамтамасыз ету. Сонымен қатар ауылдағы дарынды балалардың республика көлеміндегі іс-шараларға қатысуына ықпал ету;

– Мүмкіндігі шектеулі жандардың білім алуына оңтайлы жағдай туғызуға;

– Қоғамда сыбайлас жемқорлыққа жол бермеу және оның алдын алу шараларын жасауға ықпал етемін;

– Округке қарасты тұрғындардың әлеуметтік мәселелерінің шешімін табуына ықпал етемін. Сайлаушылармен үнемі байланыста болып, олардың ұсыныстарын мәслихаттың сессияларында және тиісті мекемелерге жеткізіп, олардың орындалуына тікелей араласамын;

– Біз бүгін жоғары технологияның дамыған заманында өмір сүріп жатқанымызды мақтан тұтамыз, бірақ ауыл мектептерінде компьютерленген бағдарламалар әлі де енгізілмеген. Демеушілік көмекке жүгіну арқылы кәсіпкерлердің ерікті түрде ауыл мектептерін қамқорлыққа алуын ұйымдастыру. Сондай-ақ, білім саласында туындаған түрлі мәселелердің шешілуіне барынша күш-жігерімді жұмсаймын.

Құрметті аудан  тұрғындары!

Маған сенім білдірсеңіздер, сенімге селкеу салмай өзіме тапсырылған құзыреттілігімнің аясында елімізге тиімді болатын барлық істі атқаруға дайынмын. Сіздердің дауыстарыңыз мен үшін маңызды.

Депутаттыққа кандидаттың сайлауалды бағдарламасын сайтта жариялау РЕСПУБЛИКАЛЫҚ БЮДЖЕТ ҚАРАЖАТЫНАН ТӨЛЕНЕДІ.