Ауыл шаруашылығы еңбеккерлерінің ІІ форумында «MG» шаруа қожалығының балықшысы Мамырханов Бекзат Айдарұлы «Құрмет» орденімен наградталды.

Мемлекет басшысы Қасым-Жомарт Тоқаевтың қатысуымен өткен форумда аграрлық саланың дамуына айрықша үлес қосқан азаматтар марапатталды. Солардың бірі жерлесіміз, балық өсіру ісінің нағыз маманы Бекзат Айдарұлы. Ол ауданның балық шаруашылығы мен ауыл шаруашылығы саласын ілгерілетуге қосқан зор еңбегі, заманауи технологияларды өндіріске енгізуі және жоғары сапалы өнім өндірудегі үздік көрсеткіштері үшін «Құрмет» орденін кеудесіне тақты.

Бүгінде «MG» шаруа қожалығы форель өсіру ісін жүйелі дамытып келеді. Шаруашылықтың жұмысы өңірдің азық-түлік қауіпсіздігін нығайтуға, жергілікті тұрғындарды тұрақты жұмыс орындарымен қамтамасыз етуге үлкен үлес қосуда.

Бекзат Мамырханов балық өсірудің барлық кезеңін – тоғандарды әзірлеуден бастап өнімді жинауға дейін мұқият бақылап, әрбір процесте жоғарғы жауапкершілік, еңбекқорлық және кәсіби біліктілік танытып келеді. Оның тәжірибесі мен еңбегі балық шаруашылығы саласының дамуына, сонымен қатар аудан экономикасының нығаюына айтарлықтай үлес болып отыр.

Еңбек форумы аясында көрсетілген бұл марапат ауыл шаруашылығына адал қызмет етіп жүрген азаматтардың еңбегіне деген жоғары құрметтің белгісі болды.

Өз тілшіміз.