Аудан аумағындағы тұрмыстық зорлық-зомбылықтың алдын алу, отбасылық құндықтарды насихаттау мақсатында «Зорлық-зомбылықсыз 16 күн» акциясы өтіп жатыр. Акция аясында осы аптада Есік гуманитарлық-экономикалық колледжінде жастармен кездесу болды.
Жиынға қатысқан аудан полиция басқармасы әйелдерді зорлық-зомбылықтан қорғау тобының аға инспекторы Райгүл Рашидқызы баяндама жасап, жастарды бұл заң бұзушылыққа немқұрайды қарамауға шақырды.
– Қазір көптеген қыз-келіншектер отбасында орын алатын зорлық-зомбылықты жасырып өмір сүруде. «Ұят» деген желеумен қорлыққа төзіп жүре береді. Бұлай болмауы тиіс, 102 немесе 150 сенім телефонына хабарласса, мамандар қол ұшын созады. Отбасында қиындық көрген қыз-келіншектер ауданымыздағы немесе Алматы қаласындағы дағдарыс орталығына орналастырылады. Орталықта 6 айға дейін тұрып, психолог мамандардан кеңес алып, мамандық меңгеруге мүмкіндік жасалған, – дейді полиция қызметкері.
Ауданымыздағы дағдарыс орталығының жетекшісі Ұрқыз Илиева отбасындағы зорлық-зомбылықтың құрбаны тек әйелдер ғана емес, ерлер де зардап шегетінін айтты. Сондықтан сенім телефоны барлығына бірдей қызмет көрсетіп, ақпараттар құпия болатынын айтты.
Шара барысында колледж студенттері зорлық-зомбылыққа қарсы дайындаған плакаттарын жұртшылық назарына ұсынып, өздерінің ой-пікірлерін жеткізді. Жиын соңында жастар зорлық-зомбылыққа қарсы екендерін айтты.
С.НҰРАДИН.
