Қазақстан Республикасы Тәуелсіздігінің 30 жылдығы мен «Балалар әдебиеті жылына» орай «Еңбекшіқазақ» газетінің редакциясы ұйымдастырған «Тәуелсіздік жүрегімде» атты әдеби байқау өз мәресіне жетті.

Әдеби байқауға Алаш елінің азаттығы мен ұлттың рухани бостандығын тебірене жырлаған, өскен өлкесі мен туған жұртының  қадір-қасиетін қара сөзбен кестелеген 30-ға жуық шығарма келіп түскен болатын. Байқау талаптарына сай ойы өрелі прозалық шығармалар мен кестедей келісім тапқан  поэзиялық туындылар үздік деп танылды. Әдеби аламанда, Әл-Фараби атындағы орта мектептің  оқушысы Балауса Нұрахмет топ жарса, Райымбек батыр атындағы орта мектептің  оқушысы Аякөз  Ертай мен №1 Рахат орта мектебінің оқушысы Нұрислам Абдыхамыт ІІ орынды еншіледі. Таутүрген негізгі орта мектебінің оқушысы Рамазан Тіленчиев, Абай атындағы орта мектептің оқушысы Индира Османова мен Әймен орта мектебінің оқушысы Ақмамық Сәтей үздік үштікті түйіндеді. Байқау жеңімпаздарына арнайы сыйылықтар мен мадақтама қағаздарын табыстаған газеттің бас редакторы Х.Ахметжанов өрімдей жасөспірімдердің өнерін жоғары бағалап, оларға шығармашылық табыс тіледі.

Е. АСЫЛ