Бүгінде қоғамның қам-қарекеті әр азаматтың қолайлы ғұмыр кешуі жолына бағыт алғанын аңғару қиын емес. Демек замана сұранысының   қажеттілігін өтеу – жергілікті билік өкілдерінің негізгі міндеті. Өткен жылға өкпе жоқ. Сан-салада серпіліс байқалып, өңірдің шырайы кірді. Қалай десек те, әлеуметтік өзгеріс пен өмірдің жаңаруын дәстүр сабақтастығы мен аға буынның төккен терінен бөліп қарауға болмайды. Бүгінде аудан ардагерлерінің ауыл-аймақтың жайын күйттеп, мәселенің шешілу жолдарына араласуы қуантады.

Өткен аптада аудан әкімі Қуат Сұлтанғазиев ардагерлермен кездесті. Ең әуелі аудандық ардагерлер кеңесінің төрағасы Тілеулес Ұзақов жаңа тағайындалған аудан әкімін қызметімен құттықтап, ел тізгінін ұстаған азаматтың жұмысына табыс тіледі. Кездесуде өзге ардагерлер де  қоғамның жаңаруы мен жаңғыруы, өңірдің өркендеуі мен береке-бірілігіне қатысты салиқалы ойларын ортаға  салды.

– Қоғамның қаншалықты өркениетті, қаншалықты зиялы екендігі ардагерлерге деген құрметпен өлшенген. Аға ұрпақтың өнегесі, ақылы қоғамға қай уақытта да қажет. Ынтымағы мен бірлігі жарасқан ауданымызда ардагерлер қауымы жастарға  қашан да жол  сілтеп, бағыт-бағдар беруден еш жалықпасына сенемін», – деді аудан әкімі.

Е.АСЫЛ