Халықаралық әйелдер күні мерекесі қарсаңында аудан әкімі Қуат Сұлтанғазиев өңіріміздің  қоғамдық-саяси, мәдени дамуына үлес қосқан ардагер аналардың  шаңырағына арнайы барып құттықтады.

Қуат Елеусізұлы Түрген, Қаракемер, Шелек ауылдық округтерінде тұратын  Қания Аюбаева, Көкен Өтегенова, Тамара Махпирова, Алмагүл Орынбетова сынды аналардың отбасына атбасын бұрып, ақ жаулықты аналарды мерекемен құттықтап, арнайы сый-сияпат табыстады. Ұзақ жылдар түрлі салада өнімді еңбек еткен зейнеткерлер жаңа тағайындалған өңір басшысының қызметіне зор табыс тілеп, ыстық ықыластарын білдірді. Бұл ретте аудан әкімі:

– Ана – тіршіліктің тірегі, отбасының берекесі, бүкіл адамзаттың тәрбиешісі, жақсылықтың бастауы. Ел тарихының қай кезеңінде болсын, батыр аналарымыз асқан ерлігі мен өнегелі істерінің арқасында бірлік, тұрақтылық, өркендеу сияқты арқаулы құндылықтар қалыптастыра білген. Бүгінгі мерейлі мереке күндерінде дендеріңізге саулық, отбасыларыңызға бақ пен береке, шаңырақтарыңызға шаттық тілеймін, – деп, ақ тілегін жеткізді.

Е.АСЫЛ.