Дана халқымыз «Әйел бір қолымен бесік тербетсе, екінші қолымен әлемді тербейді» демекші, бүгінгі бар тіршілік, жарық дүние, бақытты өмір әйел-ананың аялы алақанында. Қазіргі қоғамымызда әйелдер тек отбасының береке-бірлігін ойлап қана қоймай, мемлекетіміздің өркендеуіне және саяси-әлеуметтік, мәдени мәселелеріне белсене араласып келеді. Осы орайда аудан әкімдігінің үлкен мәжіліс залында аудандық мәслихат хатшысы Бекет Ахметов пен аудандық мәслихаттың депутаттары қыз-келіншектерді құттықтады.

Әсемдік пен әдеміліктің, сұлулық пен сымбаттылықтың жаршысындай болған мерейлі мерекемен ауданның әлеуметтік-экономикалық дамуына үлес қосып жүрген нәзік жандыларды құттықтай отырып, аудан әкімінің Алғыс хаты мен арнайы мерекелік сыйлықтарды табыстады.

Сондай-ақ, мереке қарсаңында Бекет Төлегенұлы аудандық санитарлық-эпидемиологиялық бақылау басқармасының ұжымымен кездесу өткізді. Шараға басқарма басшысы М.Азербаев пен Есік қаласы әкімінің орынбасары М.Қосжанов қатысты.

Кездесу барысында ҚР Президенті Қасым-Жомарт Тоқаевтың төрағалығымен өткен «Nur Otan» («Аманат») партиясының кезектен тыс съезінде қаралған мәселелерге тоқталып, жаңа атауға ие болған партиясының алдағы жоспарлары мен бағыт-бағдарларына, соның ішінде сайлауалды бағдарламаны орындауға бағытталған Еңбекшіқазақ аудандық мәслихаттың VII шақырылымының жұмысына қысқаша тоқталып өтті. Сонымен қатар, мәслихат атынан ұжымның жұмысына табыс тілей отырып, мерекелік Құрмет грамоталары мен Алғыс хаттар табыстады.

Өз тілшіміз.