Жуырда Еңбекшіқазақ ауданында «Көктем-2023» республикалық командалық штабтық оқу-жаттығу шеңберінде көктем мезгілінде төтенше жағдайларды жою кезіндегі іс-қимылдарға азаматтық қорғаудың мемлекеттік жүйесінің басқару органдары мен күштерін дайындау жөнінде жоспарлы іс-шаралар пысықталды.

Аудандық азаматтық қорғау қызметтерінің басшыларына және ауданның шұғыл әрекет ету жасағының күштері мен құралдарын әзірлікке келтіру жөнінде тапсырмалар берілді.

Жоспарға сәйкес су тасқынына қарсы бірқатар іс-шаралар кешені жүргізілді. Атап айтсақ, Есік қаласы, Алматы көшесіндегі көпқабатты тұрғын үйлердің арасынан өтетін су өткізу арнасы мен құбырлы өткелді күл-қоқыстардан тазарту жұмыстары атқарылды. Сондай-ақ Уральская, Вавилова, Трудовая көшелерінен ағып өтетін Микушин өзені арнасының түбі тереңдетіліп, мұз құрсауларынан тазартылды.

Сонымен қатар, ауданымыздағы Тескенсу, Бәйдібек би, Қаратұрық, Қазақстан және Қорам ауылдық округтерінде аса қауіпті болып табылатын учаскелерде арнайы техниканың көмегімен өзен арналары, арықтар, каналдар тазартылды. Аталған аймақтар үнемі бақылауда.

Аудандық ауқымды оқу-жаттығу шарасына 13 техника мен 80 адам жұмылдырылды.

Аян ЫДЫРЫСОВ,

аудандық құрылыс, сәулет, қала құрылысы бөлімінің бас маманы.