Ат басына күн туса,

Ауыздықпен су ішер.

Ер басына күн туса,

Етігімен су кешер.

Иә, апат айтып келмесі анық. Көктем мезгілінде еліміздің бірқатар аймағын су басып, халқымыз қиын жағдайда қалды.  Осындай кезде бір жағадан бас, бір жеңнен қол шығару айрықша маңызды.  Осы орайда ауданымызда орналасқан «Тау-Жаңашар» сауықтыру лагеріне Қостанай облысынан 40 бала жіберілген еді.

Бірлік күні қарсаңында Қостанайлық бала-ларға арнап мерекелік іс-шара ұйымдастырылды. Жиынға аудан әкімі Талғат Байеділов, аудандық маслихат төрағасы Бекет Ахметов, аудан әкімінің орынбасары Ертай Нұрмаханов, «Аманат» партиясының аудандық филиал төрағасы Бағдат Рахимов, аудандық маслихат депутаты Сайра Базилбекова және Түрген  ауылдық округінің әкімі Мақсат Демесинов қатысты. Шара барысында аудан әкімі балаларды мерекемен құттықтады.

– 1 мамыр – Қазақстан халықтарының бірлігі күні.  Баршаңызды айтулы мерекемен құттықтаймын. «Бірлік болмай, тірлік болмас» демекші, елде болып жатқан су тасқыны халқымызға ауыртпашылық әкелуде.  Ештеңеге қарамастан барлық маман иесі осы су тасқынын тоқтатуға атсалысуда. Осындай қиын кезде бір-біріміздің жанымыздан табылып, демеу беру – біздің міндетіміз.  Кез келген елдің тілегі де, арманы да халқының бейбітшілігі мен бірлігін сақтау екені сөзсіз. Біз халқымызға қашан да көмек қолын созуға дайынбыз. Сіздерге тек амандық, төзімділік пен сәттілік тілеймін, – деді Талғат Ескендірұлы. 

Келген қонақтар да  төтенше жағдайдан зардап шеккендерге қолдау білдірді.  Шара соңында кәсіпкерлер оқушыларға сый-сияпат табыстап, көңілдерін көтерді.

  Айерке МЕРЕКЕҚЫЗЫ.