Есік гуманитарлық-экономикалық колледжінде Гранада қаласының тұрғыны, қоғам белсендісі Үміт Каналбекқызының ұйымдастыруымен  Қазақстан мен Испан мемлекеттері арасындағы достық қарым-қатынас пен әдет-ғұрыпты, салт-дәстүрді дәріптеу, мемлекеттік тілді нығайту мақсатында іс-шара өтті. 

Кешке Еуропалық деңгейдегі жобалардың аға кеңесшісі Мария Гонсалес, әкімшілік және құқық ғалымы Джусайма Перегрина,  Гранада университетінің бейнелеу өнері факультетінің  профессоры Иса де Харо, музыкалық білім профессоры Виктор Родригес дос Сантос және «Жазғы студио өнері» бағдарламасының суретшілері қатысты.

Ең алдымен испаниялық қонақтарға қазақ халқының  ұлттық аспаптары, киімдері және «Ұста Дәркембай» атындағы мұражайдың экспонаттары таныстырылды. Испандықтар қазақтың көз тоймас байлықтарымен көм-керілген көрмесіне қызыға қарады. Әжелер қонақтарға күміс білезіктерді сыйға тартты. Ары қарай іс-шара Сүйінбай атындағы Алматы облыстық филармониясы  ұйымдастырған концерттік бағдарламаға ұласты. Қобыз бен домбыра күмбірлеп, әншілер  «Қазақ вальсі», «Қазақтай ел қайда?», «Клавелитос»,  «Поппури», «Бэссамэ мучо» әндерін орындап, көпшіліктің көңілінен шықты. Аудан әкімінің орынбасары Ертай Нұрмаханов келген қонақтарға  алғысын білдірді.

– Қонақжайлылық – қазақ халқының ұлттық салт-дәстүрінің бірі. Сонымен қатар адамдар арасындағы сыйластықты, қамқорлықты білдіретін, кісінің адамгер-шілігін, имандылығын айқындайтын қасиет.  Сіздердің осынау тарихы терең қаламызға қонақ болуларыңыз – біз үшін мақтаныш.  Қазақстан мен Испания арасындағы дипломатиялық қатынастар 1992 жылы орнатылды. Содан бері сауда-экономикалық, мәдени-гуманитарлық және ғылым-білім беру саласындағы ынтымастық нығайып келеді.  Біздің ауданымызға келгендеріңіз үшін алғысым шексіз.  Ел арасындағы бірлігіміз жарасып, татулығымыз арта берсін.  Сіздерді әрдайым қуана қарсы аламыз. Еліміз аман, жұртымыз тыныш болсын,  – деді Ертай Сұлтанәлиұлы.

  А.МЕРЕКЕҚЫЗЫ.