Қазақ қоғамында қыз баланың тәрбиесі ешқашан маңыздылығын жойған емес. Себебі бабаларымыз «ұл бұзылса жұрт, қыз бұзылса ұлт бұзылады» деп, қыз баланың тәлім-тәрбиесіне баса мән берген. Осы орайда «Қазақ аналары – дәстүрге жол» атты республикалық қоғамдық бірлестігі елеулі еңбектер атқарып келеді. Жуырда аталған бірлестіктің аудандық филиалының төрайымы Базаркүл Камрадинованың ұйымдастыруымен, ақ жаулықты аналардың қатысуымен Есік гуманитарлық-экономикалық колледжінде «Қыздарға әсемдік жарасады» тақырыбында жастармен кездесу өтті.
Мәні мен мағынасы жа-расқан шарада Сажида Тұрғанбаева, Баян Лұқпанова, Нұрзира Қилыбасова, Бақытгүл Аубакирва, Күлсара Оразбекова, Тұрсынхан Танекеева сынды ардақты аналар ұлттық құндылық, қыз бала әдебі, салт-дәстүр, білім мен өнер тақырыптарында орамды ойларымен, келелі кеңестерімен бөлісті. Кеш барысында ақ жаулықты аналар ән салып, би билеп, әдет-ғұрпымызға сай көріністерін де ұсынды. Сұрақ-жауап айдарында жастар өздерін толғандырған сауалдарына мағыналы жауаптарын алды. Түрлі өркениеттер мен құндылықтар арпалысып, кейбір түсініктеріміздің өзі жаңа сипатқа ие болып, нәзік жандыларымыздың қоғамдағы орны әр қилы қиындықтарға тап болып жатқан қазіргі ғасырда қазақ қыздарының қандай болу керектігіне кеңінен тоқталып, өнегелі үлгісін көрсеткен аналарға колледж жастары зор ризашылықтарын білдірді.
Ринат НАРХАНОВ.
