Абылай хан атындағы орта мектептің ұйымдастыруымен «Ғаламтор – ғаламның ғаламат қоймасы» атты облыстық іс-тәжірибе тарату мақсатындағы ашық есік күні өтті. Іс-шараға Алматы облысы білім беруді дамыту оқу-әдістемелік орталығының директоры Гульжихан Иманхатова, Алматы облысы білім басқармасына қарасты ақпараттық технологиялар орталығының директоры Марлен Аубакиров, аудандық білім бөлімінің басшысы Арайлым Төлеубекова, аудандық білім бөлімінің сектор меңгерушісі Зарина Булекбаева, аудандық білім бөлімінің әдістемелік кабинет меңгерушісі Айжан Тортаева және мектеп мұғалімдері қатысты.

Ең алдымен қонақтарға шараның бағдарламасы таныстырылды. Бағдарлама «Жоба жұмыстарын қорғау», «Жұлдыздар аллеясы», «Композицияланған көрме», «Lunch event «Qatty tatti» фуршет», «Ашық сабақтар аллеясы», «Ашық есік күніне кері байланыс» сынды 6 бөлімнен тұрды.

«Бүкіләлемдік өрмек – ғаламтор» жас зерттеушілер аллеясы көпшілік алдында өз жобаларын қорғады. Жанеля Камаш ұстазы Айгүл Жүнісжановамен «Қанағат, рақым, ойлап қой», «Интернеттің зияны», Көркем Сарабек ұстазы Айгүл Досымхановамен «Ғаламтор ғаламаты мен мектептегі ғаламтор», Мерей Батырғали ұстазы Орынкүл Мыркалыковамен «Табысты оқушы және ғаламтор, ҰБТ-ға дайындықтың тиімді жолдары», Жанбота Сыдыкова мен Айзере Еспенбет ұстазы Елена Мамедовамен «The power of Internet», Аяла Қалманбай ұстазы Жанар Уразимбетовамен «Ғаламтордың пайдасы» тақырыбында ғылыми жобаларды қорғады.

Бағдарлама бойынша жиналған қонақтарға фуршет ұсынылды. Іс-шараның келесі бөлімінде қонақтар «Жұлдыздар» аллеясымен, «Суретшілер» галереясымен танысып, әлеуметтік желі логотипі бойынша өткізілетін ашық сабақтарға қатысты. Әр сыныпта жаңа заман талабына сай әдістермен ашық сабақтар өтті. Шара соңында ұстаздар арасында ашық есік күніне кері байланыс жүргізілді.                      

    А.МЕРЕКЕҚЫЗЫ.