Білім және ғылым министрлігінің мәліметінше, елімізде 5 285 ауыл мектебі бар. Бұл барлық мектептің 75 пайызын құрайды. Демек, орта білімнің деңгейі ауыл мектептерінің аяқалысына, жалпы жағдайына тікелей байланысты. Осыдан-ақ ауыл мектебін елдегі барша білім ошағының діңгегі деуге болады. Осы орайда Алматы облысы әкімінің номинациясы аясында облыстық білім басқармасы мен облыстық әдістемелік орталықтың ұйымдастыруымен «Үздік ауыл мектебі» байқауының облыстық кезеңі өтті.

Ауыл мектептерінің мәртебесін арттыру, жаңа идеямен шығармашылық-инновациялық режимде жұмыс жасайтын білім беру ұйымдарын анықтау, қолдау және тәжірибесін насихаттау мақсатында ұйымдастырылған шара жоғары деңгейінде өтті. Іле ауданындағы №48 орта мектебіндегі байқауға аудандық сайыстарда үздік деп танылған 9 білім шаңырағы қатысты.

Шығармашылық бағытта жұмыс істейтін үздік білім шаңырағын анықтап, озық істәжірибені тарату байқауының бірінші кезеңінде білім беру мекемесі жетістіктерінің портфолиосы сараланды. Одан кейін байқауға қатысушылар өзін-өзі таныстыру сынынан өтті. Ал үшінші кезеңінде мектеп моделі қорғалды. Бұл ретте ұстаздар білім берудің озық технологияларын қолдану аясын, нәтижелі жұмыс үлгілерін ортаға салып, мектептің жалпы ұстанған бағыт-бағдарын атап өтті.

Байқауда ауданымыздың намысын қорғаған Жанар Мұқалиева басшылық етіп отырған Қаратұрық ауылдық округіне қарасты А.Бертаева атындағы орта мектеп III орынды иеленді.

Ұлт болашағын тәрбиелеудегі ұлағат иелерінің жемісті еңбегінің арқасында облыстық деңгейдегі сайыстан жүлделі оралған білім шаңырағының әлі де биік белестерді бағындырары сөзсіз. 

Өз тілшіміз.