Өнер мен білімнің ордасы саналатын Алтынбике Бертаева атындағы орта мектепте қазақ поэзиясының ақиығы, ұлы ақын Мұқағали Мақатаевтың туғанына 95 жыл толуына орай «Мұқағали – мәңгі жүректе» атты тағылымды рухани кеш өтті. Бұл шара жас ұрпақтың бойына ұлттық рух пен әдебиетке деген сүйіспеншілікті сіңіруге бағытталды.

Кеш барысында Мұқағали Мақатаевтың өмір жолы мен бай шығармашылығына кеңінен тоқталып, оның қазақ әдебиетіндегі айрықша орны айтылды. Ақынның «Аққулар ұйықтағанда» поэмасы, ел мен жерді асқақтата жырлаған «Алтай-Атырау», ерлік пен рухты арқау еткен «Райымбек! Райымбек!», сондай-ақ терең философиялық мәнге ие «Моцарт. Жан азасы» реквиемі туралы мазмұнды ойлар ортаға салынды.

Шараның ресми бөлімінде сөз кезегі мектеп директорының оқу ісі жөніндегі орынбасары Гүлнар Смағұлова ақын мұрасының тәрбиелік маңызына тоқталды. Келесі кезекте Мұқағали Мақатаевтың кең   тынысты шығармаларының бірі «Алтай-Атырау» поэмасынан үзінді оқылып, көрермендерге ерекше әсер сыйлады.

Кештің екінші бөлімі «Бала дауысы» байқауымен жалғасын тапты. Байқау барысында Мұқағалидің өлеңдеріне жазылған әндер орындалып, жас өнерпаздар өз өнерлерін көрсетті. Байқаудың әділқазылар алқасының құрамында Қаратұрық ауылдық кітапханасының кітапханашысы Адиша Кегенбаева, мектеп директорының тәрбие ісі жөніндегі орынбасары Қымбат Ызғарбекова, музыка пәнінің мұғалімі Тұрғанжан Ганиев болды.

Әділқазылардың шешімімен байқаудың бас жүлдесін жанды дауыста домбырамен өнер көрсеткен 10 сынып оқушысы Мұрат Мағыпар иеленді.

Шара соңында әділқазылар алқасы сөз сөйлеп, қатысушылардың өнеріне жоғары баға берді. Кешке белсене қатысқан оқушылар Еңбекшіқазақ аудандық кітапханасының директоры Дариға Жанабилованың Алғыс хатымен марапатталды.

Бұл – жас өнерпаздарға көрсетілген үлкен қолдау мен рухани ынталандыру болды.

Есен НАҚЫСБЕК,

А.Бертаева атындағы орта мектебі қазақ тілі мен әдебиеті пәнінің мұғалімі.