Елімізде Парламенттік реформа жөніндегі жұмыс тобы мен Конституциялық комиссия қызметі жұмысының нәтижесі ретінде Ата заңның жаңа жобасы жарияланып, талқыланды. Отандастарымыздың ұсыныс-пікірлері ескеріліп жасалған жаңа Конституцияны қабылдау бойынша 15 наурызда жалпыұлттық референдум өтеді.

Осы орайда Шелек политехникалық колледжінің конференц залында  «Жаңа Ата Заң – жаңа құндылық» тақырыбында дөңгелек үстел өтті.

Қазақстан Республикасының Конституциясына енгізілген өзгерістер мен толықтыруларды талдау, Ата заңның қоғамдағы рөлін түсіндіру және құқықтық мәдениетті арттыру мақсатында өткен бұл басқосуға аудан әкімдігінің, сот, баспасөз қызметінің өкілдері, колледж ұжымы, жергілікті басқару қызметкерлері, әлеуметтік серіктестер мен ата-аналар кеңесінің мүшелері қатысты.

Колледж директоры Қуат Дүйсебаев Конституцияға енгізілген өзгерістер мен толықтырулар бойынша баяндама жасап, Жаңа Ата заңның әрбір тараулары мен баптары, олардың өзектілігі туралы айтып берді. Одан кейін жиынға қатысушылар: аудандық қоғамдық кеңестің төрағасы, аудандық кәсіподақ комитетінің төрағасы, аудандық мәслихаттың депутаты Серік Надырбаев, заңгер Анар Куленова, Шелек орман шаруашылығының бұрынғы директоры, еңбек ардагері Бекболат Алтаев, Ы.Алтынсарин атындағы орта мектептің директоры Маруп Искаков, аудандық «Еңбекшіқазақ» газетінің тілшісі Анарбек Бердібаев, колледж мұғалімдері Динара Жумагулова, Жанат Бағашар, Бану Кулбаева  Конституцияның негізгі тараулары туралы бойынша талдау жасады, өз ойларын айтты.

Модератор Қуат Құрманғалиұлы жиынды қорытындылап, Ата Заңды құрметтеу, заң талаптарын сақтау және құқықтық мәдениетті қалыптастыру – әрбір азаматтың ортақ міндеті екенін атап өтті. Дөңгелек үстелге қатысушыларға алысын білдірді.

А.МӨКІШҰЛЫ.