Алғашында атқамінерлердің сапары В.Терешкова атындағы орта мектептегі күрделі жөндеу жұмыстарын бақылаумен басталды. Құрылысты «Еңбек» ЖШС 135 млн теңгеге жүргізіп жатыр. Сонау 1972 жылдары салынып, күні бүгінге дейін жөндеу көрмеген білім ошағы жаңа оқу жылында бұйыртса, білімгерлерін түрленген кейпінде қарсы алмақшы. Жан-жақты зерделеген аудан басшысы «Бұл – біздің болашақ ұрпағымыз оқитын білім ордасы. Сондықтан құрылыс сапасына ерекше мән беру керек» – деді.

Талай жылдан бері нашақорлар мен нәпсіқұмарлардың ошағы болған Шабалдинка бүгінде жастар саябағына айналып, қаламызға сән бермекші. 130 млн теңгеге ұтып алған мердігері – «Сұңқар» ЖШС. Аудан басшысына жан-жақты құрылыс жұмыстарын түсіндірген мердігер басшысы Ибрагим Кибировтың айтуынша, Шабалдинканың шырайын кіргізу оңайға соққан жоқ. Тонна-тонна түрлі қоқыстардан тазартудың өзіне айға жуық уақыт кеткен. Енді бірер айдан кейін жастар үшін арнайы би алаңы, веложолдары мен 1000-ға жуық көрерменді еркін қабылдай алатын концерттік алаңы бар саябақ жұмысын бастайды. Бастысы, кезінде қолдан жасалған Шабалдинка көлі де қалпына келеді. «Көлдің суы уақытында тазартылып отырсын. Қауіпсіздік ережелері де бекітіліп, талапқа сай жүргізілсін. Себебі, тереңдігі 4 метрге дейін болады ғой», – деді Бинәлі Әбдіқапасұлы бұл турасында. Сондай-ақ: «Арнайы балалар ойнайтын әткеншектерді  қоюды қазірден жоспарлаңыздар. Кәсіпкерлерді тартыңыздар. Сонымен қатар, әжелеріміз бен аталарымыз немерелерін ертіп келеді. Үлкендерімізге де жағдай жасалатын болсын. Себебі, бұл – демалыс алаңы. Мұнда келген халық осыны сезінуі тиіс», – деді.

Тағы бір мақтанарлық жайт, арнайы субұрқақтарды орнатуды да қатаң тапсырды Бинәлі Ысқақ. «Су бар, бөлінген жері де бар. Неге субұрқақтарды орнатпасқа? Осыны қолға алыңдар». Сонымен қатар қураған ағаштарды да алып тастауды ескертті: «Орнына сапалы жас талдарды егеміз. Бірер жылда талымыз терекке айналып, көркі көз сүріндірерлік күйге енеді» деді.

Түмен ойдың түйіні, қазіргі уақытта жөндеу жұмыстарының 60 пайыздан астамы тәмамдалған саябақ 1 желтоқсан – Тұңғыш Президент күніне ашылады деп күтілуде. Сөзбен емес іспен жастарға қолдау білдіріп жатқан аудан басшыларының ел ертеңіне деген сыйын көруге біз де асықпыз.

Қайнар ЖҰМАҒОЖА.