30 мамырда ұлттық бірыңғай тестілеуді өткізу комиссиясының соңғы жиынында сынаққа дайындық сәттері пысықталды. Түлектерді тасымалдаудан бастап, оларға жан-жақты жағдай жасауды, сын сәтінде тыныштықтың қамтамасыз етілуі жайы сөз болды. Тіпті, қонуға келетіндердің жатын орны мен тамақтануын қатаң бақылауда ұстауды тапсырды комиссия төрағасы, аудан әкімінің орынбасары Алтай Досымбаев. Сондай-ақ, қандай жағдай болмасын мәдениеттілікті сақтауды ескертті. Ол турасында: «Алаң көңіл жас-тар автобусқа енгеннен бастап жүргізушінің өзі ерекше ықыласпен қарсы алсын. Адамның рухын көтеретін әуезді әндерді қойсын жол бойында. Бұл процесс жатақханада да жалғасын табуы керек. Түлектер ерекше ыстық мейірімді сезінуі ләзім. Бұл олардың сынаққа психологиялық тұрғыда дайын болуына оң ықпалын тигізеді» деді комиссия төрағасы.
Ия, биыл аудан бойынша түлектеріміздің 55,4 пайызы ҰБТ-ға қатысады яғни, 1564 оқушының 865-і сынақ алаңында өз бақтарын сынайды. Оның 597-сі қазақ сыныбынан болса, 251-і орыс сыныбы. Сондай-ақ, 17 ұйғыр азаматының 14-і қазақ тілінде, қалған 3-еуі орыс тілінде тест тапсырады. Күні кеше өткен бірінші лекте 521 оқушы өз бағын сынады. Ал ертеңгі сынақ алаңына ауданымыздан 344 оқушы енетін болады. 6 маусымда өтетін үшінші лекте Талғар ауданының түлектері тест тапсырады.
Тест қорытындысын газетіміздің келесі санынан оқи аласыздар.
Қайнар ЖҰМАҒОЖА.
