Мерекелік шараның ашылуында құрметті қонақтар көпшілікті жаңа жыл мерекесімен құттықтап, баршаның отбасына амандық тіледі. Байқау негізінде өткізілген мереке барысында қазақ, қырғыз, орыс, өзбек, ұйғыр, татар, түрік ұлт өкілдеріне бөлінген кітапханашылар сол ұлттардың тілдерінде өздерін таныстырып, ұлттық киімдерін киді. Салт-дәстүрі мен әдет-ғұрыптарын көрсетіп, өнерлерін ортаға салды. Сондай-ақ, түрлі ұлттардың тағамдарын әзірлеп, дастархан жасады. Сайысқа қатысушылардың өнерін Шаяхмет Құсайынұлы, Нұрғиса Алишев пен кітапхана директоры Салтанат Мамырбекова бағалады. Мереке жоғары деңгейде өтті. Әр округтен келген кітапханашылар ән салып, би биледі. Өлең оқып, күмбірлеген қара домбыраның үнімен құлақ құрышын қандырды.
Байқау нәтижесінде, өздерінің киімдерімен, өнерімен талайды тамсандырып, ұлттық тағамдарымен көздің жауын алған қазақ тобы үздік деп танылды. Жеңімпаз бен орын алған барлық топ өкілдері алғыс хаттармен марапатталып, ынталандыру сыйлықтары табыс етілді. Шара соңында қатысушылар мен қонақтар ақ дастархан басында бас қосып, наурыз көжеден, түрлі ұлттардың ұлттық тағамдарынан дәм татты.
Сардарбек НҰРАДИН.