Ата-бабамыз ежелден бала тәрбиесіне терең мән берген. Ұлдарын елдің иесі ретінде батылдыққа, адалдыққа, отансүйгіштікке тәрбиелесе, қыздарын инабаттылыққа, сыпайылыққа, ақылдылыққа, байыптылыққа баулыған. Қыз – ертеңгі ана, өз Отанын, елін, жерін қорғайтын азамат тәрбиелейтін тұлға екенін үнемі ескеріп отырған. «Қыз намысы – ел намысы» дегенді жадында ұстап, салт-дәстүрді, әдет-ғұрыпты, үлкен-кішімен сөйлесу амалдарын, қонақ күту әдістерін жете меңгерткен.