Дәл осы күні, 2018 жылы 3 маусымда «Есік» мемлекеттік тарихи-мәдени қорық-музейінде Қазақстан мен Корея Республикасының біріккен «Ұлы Жібек жолы бойындағы Достық және Әріптестік» естелік-белгісі ескерткіші ашылды.
Корея Республикасының бастамасымен 2013 жылдан бері бұл белгі Корея, Қытай, Иран, Өзбекстан, Түркия, Үндістан сынды Ұлы Жібек жолы бойындағы елдерде қойылған. Ежелгі сауда жолының бойында тұрған қалалардың ішінен Есік қаласының таңдалуы бекер емес.
Сол заманда Жібек жолы Талхизден екі бағытқа жалғасқан: оңтүстік желісі Есік пен Түрген, Шелек үстімен жүріп, Іленің Борохудзир маңындағы өткелінен өтіп, оның оң жағалауын қуалап, Қорғас арқылы Алмалыққа жетеді де, Ыссық көл жақтан келген жол тармағымен қосылады. Бұл жол Іле өзенінің оң жағына ұласа Көктал мен Жаркент арқылы өтеді. Археологтар мұндағы Есік, Түрген, Лауар, Шелек аумақтарынан төбешіктеніп қалған орындарды зерттеген.
mezet.kz.
