20 қараша күні Еңбекшіқазақ ауданына қарасты, Шелек ауылының әкімі Сәкен Даулетханұлы Абдихалиев пен Қазақстан журналистер одағының мүшесі, Еңбекшіқазақ және Райымбек аудандарының құрметті азаматы, Шелек ауылы округінің ардагерлер және ақсақалдар кеңесінің төрағасы Әбілбек Айтақыновтың қатысуымен Құсайын Бижановтың қалта сағаты Шелек тарихи-өлкетану мұражайына табыс етілді.

Бұл сағатты 1920-1997 жылдары аралығында өмір сүрген, КОКП мүшесі, Қазақс-тан КП Балқаш, Шелек аудандық комитетінің бірінші хатшысы, ҚКП Нарынқол аудандық комитетінің хатшысы, екінші хатшысы, Балқаш өндірістік ауыл шаруашылығы басқармасының партком хатшысы, бүгінгі Шелек ауылының аудан болып тұрған кезінде шаруашылық, қоғамдық және саяси салаларда  сонымен қатар білім беру жүйесінде мол еңбек сіңірген  Құсайын Бижанов ұзақ жылдар бойы қызмет барысында пайдаланған.

Құсайын Бижанов Алматы облысының Еңбекшіқазақ ауданында туған. Қызмет жолын мұғалімдіктен бастаған ол комсомол-жастар жұмыстарына да ерте кезден араласады. Әскер қатарында болған және Сталинград шайқасына катысқан. Балқаш ауданындағы партиялық басқару жұмысына Қ.Бижанов өмір тәжірибесінен өтіп, әбден шыңдалып келеді. Кейіннен еңбегі мен ерлігі бағаланып, Ұлы Отан соғысы майданында «Қызыл Жұлдыз», I, II дәрежелі «Ұлы Отан соғысы» ордені және отыздан астам медальдармен және еңбек майданында мемлекеттік ең жоғары марапат «Ленин», «Октябрь революциясы», екі мәрте «Еңбек Қызыл ту», «Халықтар достығы» ордендерімен марапатталған. Тәрбиелеп өсірген ұлдары да жоғары білімді, бүгінде өзі секілді ел мүддесіне бей-жай қарамайтын азаматтар. Үлкен ұлы Нұрахмет Бижанов  − техника ғылымдарының кандидаты болса, ал Ақан Бижанов − екі рет сайлауға түсіп, ҚР Парламентінің сенаторы болды.Бүгінде Философия, Саясаттану және дінтану институтының директоры, саяси ғылымдарының докторы.

Ілия СҰЛТАН