Қазіргі қалыптасқан экологиялық ахуалға байланысты қоршаған ортаның жағдайын жақсартуда орман алқаптарының алатын орны ерекше. Орман қорын сақтап, оны молайту кезек күттірмейтін мəселелердің бірі болып табылады. Соңғы жылдары табиғатты қорғау, соның ішінде өсімдік ресурстарын қорғау – өзекті мəселеге айналды.
Еңбекшіқазақ ауданына қарасты өзінің тоғай-ормандарымен әйгілі болған Шелек ауылында орналасқан Шелек орман шаруашылығы КСРО Министрлер Кеңесінің 29.08.1951 жылғы №3192 қаулысы, Қазақстан ССР-ның 19.10.1951 жылғы №876 қаулысы және Министрлер Кеңесінің жанында құрылған мемлекеттік қорық басқармасының 23.10.1951 жылғы №564/56 бұйрығымен 01.11.1951 жылы құрылған.
Мұнда қазір ағаштардың сирек кездесетін түрлері өсірілетін таңғажайып тұқымбақта қылқан жапырақты және жапырақты ағаштардың 12 түрі бар. Сондай-ақ қызғылт Яхуда, келін сияқты өсімдіктер де кездеседі.
Жылдың күз мезгілінде қылқан жапырақты ағаштардың конустары (шишка) жиналып, оларды бірқалыпты жылы температураға қойып, конустар ашылған кезде тұқымдарды тазалап, қыстай сақтайды. Ал көктемде бір қарлату үшін 40-45 күнге таулардың етегіне апарылады. Одан кейін мамыр айының басында жер жылынып, тұқымдарды егуге қолайлы кезең басталады. Негізінде қазіргі таңда қылқан жапырақты ағаштарға сұраныс өте жоғары. Қыста да, жазда да бір түстілігімен қоса, өзіндік сұлулығы және ерекше иісі бар. Оларды сатып алушылардың географиясы өте кеңінен тараған, туған жерден Түркістан мен Шымкентке дейін жалғасын тауып жатады.
Тарих бетін парақтасақ, Шелек ауылының ата тарихы, әріден басталып келетін, небір тарихи тұлғалар мен талантты ұл-қыздарды өрбіткен қасиетті мекен.
Өлкеміздің көрікті жерлерінің бірі Шелек ауылы – табиғат сұлулығының жұмағы десек артық айтпаймыз. Жазда ұйытқи соғатын желі, кыста дүлей бораны, шілде мен күзде аптаған ыстығы, өзінің көз тартарлық көк майсаға оранған табиғаты жаныңды жадырататын бір керемет. Шындығында да ауыл табиғаты құлазыған көңіліңді марқайтып, жанға шипа беретін ауданымыздың мақтанышына айналған елді мекені.
Роза ТОХМАМБЕТВА,
«Алматы облысының мемлекеттік архиві» КММ-нің
Еңбекшіқазақ филиалының директоры.
