Жақында аудан әкімдігінің мәжіліс залында аудан басшысы Қуанышбек Қашқымбаев ауыл шаруашылығы саласының қызметкерлерімен кездесіп, егін науқанында шаруалардың мазасын қашыратын су тапшылығы мәселесін талқылады.  Жиынды аудан әкімінің орынбасары Бауыржан Бименов жүргізді.

– Бүгінде ауданымыз ауыл шаруашылығы өнімін өндіруден көш бастап отыр. Биылғы жылы 124 млрд теңгенің ауыл шаруашылығы өнімін өндіру жоспарланған. 9 айдың қорытындысы бойынша 86 млрд теңгенің өнімі жиналды. Аудан табиғатының қолайлылығы мен құнарлы жеріміздің арқасында біз сіздермен бірге одан да мол нәтижеге қол жеткіземіз. Бірақ осы жылы суармалы су тапшылығының салдарынан, біраз өнімді жоғалтып алдық. Осы жағдай келер жылы қайталанбас үшін, келер жылға дайындықты қазірден бастауымыз керек – деді Қуанышбек Қалиұлы.

Баяндама жасаған ауыл шаруашылығы бөлімінің басшысы Ермек Жакеевтің мәліметінше, аудандағы ауылшаруашылығы жерлерін 4 мекеме: Д.Қонаев атындағы ҮАК, «Гидросервис» ЖШС, «Талгар Элегация», «Қараш» ЖШС суармалы сумен қамтамасыз етеді. Биыл шаруалар 690 млн текше метр су тұтынған. Сондай-ақ су жүретін арықтардың жалпы ұзындығы 1421 шақырым болса, оның 774 шақырымы ғана бетондалған. 623 шақырымды су қара жер арқылы өтеді. Осы тұста егінге бағытталған судың басым бөлігі жерге сіңіп кетеді. Ермек Ильянұлы осы арналарды күрделі жөндеуден өткізу үшін жобалық-сметалық құжаттарды әзірлеу керектігін айтты.

Кезекпен сөз алған жоғарыда аталған су беретін мекемелердің басшылары биылғы су тапшылығын таудан келетін судың азаюымен байланыстырды. Табиғи құбылысқа қарсы шара қолдану мүмкін емес. Күз мезгілінен бастап көктемге дейін су жиналған. Алайда мөлшері жылдағыдан аз болған.  Алдағы уақытта да табиғаттың қандай мінез көрсететіндігін болжау қиын. Сондықтан суды үнемдеудің барлық жолдарын жасау керек. Алдымен, су арналарын ретке келтіріп, мүмкіндігінше тамшылатып суару әдісін пайдаланатын алқаптардың санын арттыру қажет. Сонымен қатар жеке меншікке өтіп кеткен аудан аумағындағы тоғандарды су беретін мекеменің теңгеріміне беру керек. Осындай ұсыныстарын жеткізген су жеткізу мекемелерінің басшылары тіршілік нәрінің тапшылығымен шаруалармен бірлесе күресетіндігін айтты.

Өз кезегінде тұтынушылар кооперативінің өкілдері де өздерінің ұсыныстарын ортаға салып, мемлекеттің көмегіне мұқтаж екендіктерін де жасырмады.

Жиын соңында аудан басшысы бюджеттен қаржы бөліп, су арналарын ретке келтіруге ауыр техникалар алу керектігін айтты. Бұл техникасы жоқ кооперативтер мен су беретін мекемелер үшін де тиімді болмақ. Сондай-ақ аудан әкімдігі жанынан жұмыс тобы құрылып, арналарға мониторинг жұмыстарын жүргізуді тапсырды. Және де, су тапшылығы мәселесімен қазірден бастап күресіп, көктемге дайындық жұмыстарын жүргізу керектігін қадап айтты. Шаруа-ларға да, су жеткізушілерге де әкімдік тарапынан қолдау көрсетілетін болады.

С.НҰРАДИН