Әманда тобықтай сөздің түйінін кесіп айтатын көреген бабаларымыз «Жігіттің іскерлігі ісінен мәлім» дейтін. Иә, сөзі мен ісі қабысқан, білім-білігі толысқан азаматтың соңынан елі ереді. Оны көпшілік қолдайды, сенім артады. Ал сенім сең бұзады.

Сенім дегеннен шығады, Елбасымыз, партия төрағасы Нұрсұлтан Назарбаев жетекші партиямыз Nur Otanнан сайланатын әрдеңгейлі депутаттарды енді іріктемек. Яғни, жоғарыда аталған игі қасиеттерді бойына сіңірген нағыз көшбасшылар ғана енді елдің атынан сөз сөйлеу құрметіне ие болады. Бұл – заман талабы, көш-керуеннің бағдары. Осы турасында Нұрсұлтан Әбішұлы өзінің 17 тамызда жариялаған Үндеуінде: «Депутаттар халықтың ортасында болып, елдің мұң-мұқтажын жеткізуге тиіс. Депутаттар міндеті – әрдайым ел мүддесін қорғау. Осыны ұмытпауымыз керек» деп мандаттың маңыздылығын шегендеп берді. Енді партия атынан депутаттық сайлауға тек мыңнан бірі ғана түсе алады. Оны таңдайтын – Nur Otanдықтар.

Бүгінде бәсеке бәсіне бәс тігіп, додаға түскен азаматтар қатарында мен де бармын. Осы уақытқа дейін аудандағы мемлекеттік қызметте еңбек еттім. Толысқан тәжірибем мен білім-білігімді ауданның тумасы ретінде өңіріміздің дамуына арнауды жөн санадым. Біріге іс қылып, биік белестерді бағындыру жолында еңбек етуге әзірмін. Себебі, бұл менің туған жерім, алтын тәжді атамекенім!

Бекет АХМЕТОВ