Ауыл шаруашылығы – аудан экономикасының басым бағыттарының бірі. Түгін тартса, майы шығатын ауданымыздың құнарлы топырағы ауыл шаруашылығы өнімдерін өсіруге қолайлы. Әсіресе, Алатаудың баурайында орналасқан елді мекендердің әлеуеті зор. Осы орайда, аудан әкімі Әлібек Жақанбаев Түрген ауылдық округінде болып, шаруалармен кездесті.

Алғашқы болып Әлібек Әскербекұлы «ЖАФ Түрген» ЖШС-не ат басын бұрды. Ауылдың төменгі жағында орналасқан агро фирма заманауи технологиямен жаңғақ өсірумен айналысуда. Сонымен қатар дәнді дақылдар алқабы да бар. Мұндағы «Фундук» және «Грек жаңғағының» көшеттері еуропалық ірі өндірушілерден жеткізілген. Жаңғақ алқабы тамшылатып суарылады. Аудан аумағындағы алғашқы әрі ірі жаңғақ өндірушілермен жүздескен Әлібек Жақанбаев жұмыс барысымен танысып, шаруаларға сәттілік тіледі.

Алма бағын өсіруде өңіріміздің әлеуетін толығымен пайдалануды қолға алған кәсіпкерлер заманауи технологияның көмегіне жүгінген. Сапар барысында аудан әкімі «Apple Word» ЖШС-нің интенсивті алма бағының материалдық-техникалық базасымен танысты. 78 гектарға жуық жерге созылған бақта алманың бірнеше түрі әлемнің озық технологиясымен өсірілуде. Сондай-ақ сыйымдылығы 3 500 тонна болатын жеміс сақтау қоймасына барып, оң бағасын берді.

Ағаш және бау-бақша көшеттерін өсіруде де аудан шаруалары қарқынды жұмыстар атқаруда. Бұған аудан басшысы «Жетісу питомнигіне» жасаған сапары барысында көз жеткізді. Мұнда жылына 500 мың түп таңқурай, 500 мың түп қарақат, 20 мың түп қара қарақат және 2 млн түп құлпынай көшеттері өсіріледі.

Тіршілігін ауыл шаруашылығы саласымен байланыстырып, кәсібінің жемісін көріп отырған шаруалармен жүздесу барысында аудан басшысы аталған салаға мемлекет тарапынан көрсетілетін қолдау алдағы уақытта да жалғасын табатынын айтып, жұмыстарына сәттілік тіледі. Бірнеше агрокешендегі осындай жетістікті аралап көрген Әлібек Жақанбаев осы қарқынмен жалғасқан жұмыстың нәтижелі боларына сенім білдірді.

С.НҰРАДИН.