Осы аптада аудандық ардагерлер кеңесінің есеп беру-сайлау конференциясы өтті. Аудан әкімдігінің кіші мәжіліс залында өткен жиынға аудан әкімі Әлібек Жақанбаев пен бірінші орынбасары Айбек Бидаев, «Nur Otan» партиясы аудандық  филиалы төрағасының бірінші орынбасары Қуат Байғоджаев, бөлім басшылары, бастауыш ардагерлер ұйымының жетекшілері қатысты. Облыстық ардагерлер кеңесінің төрағасы Ермек Келемсейіт пен бірқатар бастауыш ардагерлер ұйымының жетекшілері онлайн форматта делегаттармен  ой бөлісті.

Жиында кеңестің 2016-2021 жылдардағы жұмыс қорытындысы, тексеру комиссиясының есептері баяндалып, кеңестің төрағасы мен мүшелері сай-ланып, алдағы жоспарлар пысықталды. Аудан әкімі Әлібек Жақанбаев ардагерлердің қоғамдық істерді атқарудағы маңызды рөліне тоқталып, олардың әлеуметтік жағдайын жақсартуға баса көңіл бөлінетінін айтты. Ардагерлеріміз қашанда жоғарғы құрметке лайық. Әлібек Әскербекұлы түрлі өмір өткелдерін басынан кешіріп, өскелең ұрпаққа жөн сілтейтін қарттардың жастарға тәлім-тәрбие беру мен қоғамдық істерді атқарудағы рөлін атады. Ал олардың әлеуметтік жағдайын жақсартуға  арнайы қор құрылып,  түрлі мүмкіндіктер қарастырылатынын жеткізді. Өткен бес жылда атқарылған жұмыстар бойынша есеп берген кеңес төрағасы Тілеулес  Ұзақов-тың  айтуынша, бүгінгі күні ауданда 30 мыңнан астам зейнеткер бар.

Оның ішінде Ұлы Отан соғысының 3 ардагері, 931 еңбек ерлері, 234 Ауған және Тәжік т.б мемлекеттерде соғысқа қатысқан ардагерлер мен 18 Чернобыль апатын жоюға қатысқан ардегерлер. Кеңес төрағасының сөзінше, есепті кезең бойынша қарттарға құрмет көрсету мақсатында Есік қаласы мен ауылдық округтерде кәсіпкерлер тарапынан 5 жыл ішінде 49 млн 800 мың теңге көмек көрсетілген. Ардегерлердің ұйымдастыруымен  түрлі мәдени, спорттық және қайырымдылық іс-шаралары өткізілген.

– Ардегерлер қауымы ел арасының бірлігі мен тыныштығын бекемдеп, ауызбіршілік пен достыққа ұйытқы болып отырған үлкен күш. Соның арқасында түрлі ұлт пен ұлыс тату-тәтті өмір сүріп келеміз. «Бірлік бар жерде тірлік бар» деген ата-бабамыздан қалған қағидатты ұстансақ, болашағымыз баянды болады, – деді ардагерлер кеңесінің төрағасы Тілеулес Ұзақов.

Аудан  әкімі конференцияға қатысқан ардагерлердің ұсыныс-тілектеріне жауап берді. Әсіресе, ардегерлер үйін салу мен оларға тиісті деңгейде көмек көрсету мәселесіне орай жауапты басшыларға тапсырма беретінін айтты. Сондай-ақ қарттардың спортпен және шығармашылықпен шұғылдануына мүмкіндіктер жасалатынын айтты.

Аудандық  ардагерлер кеңесінің кезекті  есеп беру-сайлау конференциясына қала мен ауылдардан 150-ден астам делегат қатысты. Кеңестің жаңа құрамына 3 адам сайланды. Ал, тексеру комиссиясына 3 адам өтті. Облыстық ардагерлер кеңесінің конференциясына 5 адам баратын болды. Қатысқан делегаттардың мақұлдауымен Тілеулес Ұзақов аудандық ардагерлер кеңесінің төрағасы болып қайта сайланды.

– «Қарты бар елдің қазынасы бар». Біз тек қарттар мерекесі мен Жеңіс күнінде ғана ардагерлерімізді еске алып жүрміз. Бұл дұрыс емес. Олар алған білімдері мен жастық жалынын, күш-қуатын елдің әлеуметтік-экономикалық жағынан өсіп-өркендеуіне, рухани кемелденуіне арнады. Қазіргі таңда ауданымыз бойынша 30 мыңнан астам мың зейнеткер бар. Олардағы мол тәжірибе мен өмірден түйген, көрген-білгендерінің өзі бүгінгі ұрпақ үшін тірі оқулық дер едім. Сондықтан ардагерлер ұйымдарының қоғамдық жұмыстарын кеңінен насихаттау, оларды жастар мен балаларға өнеге етіп көрсете білу, өмірден алған тағылымдарын жас ұрпақтың бойларына сіңіре білу қажет. Сіздерге зор денсаулық тілеймін, – деді жиналысты қорытындылаған аудан басшысы.

Ерзат АСЫЛ.