Бүгін мемлекет басшысы Қасым Жомарт Тоқаев Қазақстан халқына кезекті жолдауын жолдады. Онда ашықтық, әділдік және Жаңа Қазақстан құрудағы басымдықтар айқындалған.
Мені көптен толғандырып жүрген мәселенің бірі мемлекеттік сатып алудағы сапа еді. Сол мәселенің оң шешімі қуантады. Енді мемлекеттік сатып алудың жаңа жүйесі жасалады.
Жері жоқ адам бизнеспен айналыса алмайды. Кәсіп жасаймын дегендерге жер беру керек. Бос жатқан жерлерді мақсатқа сай пайдалану үшін жылдың соңына дейін 5 миллион гектар жерді қайтарып алу жоспарлануда, мемлекет тарапынан бұл қолдау – бизнес бастау үшін үлкен серпіліс.
Мемлекет қаржысын мақсатты әрі тиімді пайдалануы қатаң бақылауға алу мәселесі де айтылды. Сондай-ақ білім саласы қашанда күн тәртібінің алдыңғы сатысында тұратынын мемлекет басшысы Қасым Жомарт Кемелұлы еске салып, «2025 жылға дейін 800 мың баланың заманауи мектепте оқуына жағдай жасаймыз» деген пікірі барша ұстаздар мен ата-аналарға қуаныш сыйлағандығы сөзсіз.

К.КАРАГУЛОВА,

балабақша меңгерушісі,
аудандық мәслихат депутаты, «АМАNAT» партиясының фракция мүшесі.