«Бірлік бар жерде тірлік бар» дейді. Дана жұрт мұны тегіннен-тегін айтпаса керек. Ауызбірлік пен түсіністік, қарапайым сыйластық үстемдік құрған жерлерге қашанда нәтижелі істердің үйір болатыны белгілі.

 Біздің елімізде қалыптасқан ұлттар тұтастығы мен халықтар достығының арқасында бүгінде мемлекетіміз өркендеу жолында. Қазақстанның көпұлтты халқының татулығы, ынтымақтастығы, бейбітшілігі  еліміздің ең басты байлығы. Оны көздің қарашығындай сақтау ортақ міндет. Мемлекетіміздің басты жетістігі – еліміздегі  ұлтаралық және конфессияаралық келісімі, өзара түсіністігі мен сыйластығы болып табылады. Бүгінгі таңда елімізде 136 ұлт пен ұлыстың өкілдері бір тудың астында тату-тәтті ғұмыр кешіп жатыр. Қазақстан тарихының едәуір бөлігі – оны мекендейтін этностардың  мәдени-рухани өз ара ынтымағы. Әлемдік тарихта Қазақстанның көпұлттылығы ғасырларға созылып, уақыттардан жалғасын тауып, сабақтасып келеді. Еліміз  жаңа мыңжылдыққа адамзат үшін ең қымбат қазына – ұлтаралық татулықты, конфессияаралық келісімді, өзара түсініктік пен құрмет сезімін, жарастық пен келісімді қастерлеп сақтай отырып қадам басты.

 «Тату елге тыныштық орнайды, бейбіт елде ғана береке болады», – деген атам қазақ. Демек, жүзі басқа, жүрегі бір, тілі басқа, тілегі бір ұлттар арасындағы татулықтың арқасында елімізде әлі де талай тындырымды шаралардың шымылдығы түріліп, тұсауы кесілері сөзсіз.

Ауызбірлік пен түсіністік, қарапайым сыйластық үстемдік құрған жерлерге қашанда нәтижелі істердің үйір болатыны белгілі.

Татулығымыз бен бауырмалдығымыз, ынтымақ-бірлігіміз әрдайым мықты әрі берік болғай. Әлихан Бөкейханның мына бір қанатты сөзіндегідей «Бізде бірлік болып, іс қыла білетін шебер табылса, Алаштың баласы бақыт-махаббат жолына түсті!» деп үміт артамыз.

Мадина Абильғазы,

маман-дінтанушы