Жыл сайынғы мамыр айының тоғызында ерекше аталып өтілетін Ұлы Жеңіс күні әрқайсымыз үшін жақын да қымбат  мереке. 1941-1945 жылдарын қамтыған Ұлы Отан соғысының жеңіспен аяқталғандығына 76 жыл толуы мерекесіне санаулы күндер қалды. Жеңіс күні – бұл сан мыңдаған ұрпақ үшін ортақ мереке. Бүгінде сол бір алапат соғысты бастан кешкен ардагерлердің қатары күннен-күнге сиреп барады. Біз қашан да ерліктерінің даңқы дастанға айналған батыр бабаларымызды еске  алуды перезенттік парыз санаймыз.

Сол бір адамзат тарихында бұрын-соңды болмаған  сұрапыл соғыста   қасиетті отаны үшін миллиондаған  ерлер толарсақтан қан кешті. Сол ел қорғаған  ерлердің бірі Төлен Нұрғазиев. Бартоғай топырағының тумасы жеті жылдық мектепті үздік бітіріп, әскер қатарына шақыртылып, ұшқыштар учи-лищесінде оқытылған. ұшқыш-механик маман ретінде майданға аттанады. Ол Кеңес одағының батыры, гвардия подполковнигі Шумский басқарған 93-полкінің «Ил - 2» штурмовигінің атқышы болып 70 рет әуе шабуылына қатысып, ерен ерлігімен көзге түседі. Немістермен болған аспан айқасында Төлен Нұрғазиев ұшағына екі мәрте жау оғы тиіп, ауыр жараланады. Кейін госпитальде жатып, ұзақ уақыт емделеді. Шайқастағы ерлігі үшін Төлен Нұрғазиев «Қызыл жұлдыз», «Ерен ерлігі үшін» және өзге де көптеген медальдармен марапатталған. Ол соғыстан 2 топтағы мүгедек болып оралғаннан кейін қазақ педагогикалық институтының география факультетін сырттай бітіріп, Шелек ауданының мектептерінде 42 жыл ұстаздық етті. Бүгінде мәуелі бәйтеректей Нұрғазиевтер әулеті аталарының ұстаздық жолын жалғастыруда. Ардагердің есімін ардақтау мақсатында 2007 жылы Төлен Нұрғазиев өзі өмір сүрген Достық ауылындағы көшелердің біріне  майдангер есімі берілді. Бүгінде арадагердің көзін көргендер жауға жасын түсірген батырдың  ерлігін, еңбек жолын, берген тәлім-тәрбиесін, үлгі-өнегесін жастарға жыр қылып айтады. Ерлікті ұлықтайтын ұрпақ барда ардагерлер есімі мәңгі өшпек емес.

Алдияр Жақатұлы,

жаттықтырушы