Тарихи мәдени ескерткіштер – ұлттық тарихымыз бен мәдениетіміздің құнды жәдігерлері болып табылады. Қазіргі таңда Еңбекшіқазақ ауданында жалпы саны 386 тарихи-мәдени ескерткіштер бар. Оның ішінде 284 ескерткіш археологиялық, 102 ескерткіш архитектуралық ескерткіштер бар.
Биылғы жылы ескерткіштерді қорғау мен сақтаудың тиімділігін артыру мақсатында Алматы облыстық тарихи-мәдени мұраны қорғау орталығымен бірлесе отырып аудан бойынша барлық ескерткіштерге бақылау-барлау жұмыстары жүргізілуде. Яғни, ауданымызда орналасқан ең көне ескерткіштерден бастап соңғы жылдары жаңа салынып мәдени мұраларымыздың қатарына енген барлық қала және сәулет ескерткіштері, археологиялық ескерткіштердің орналасу орындары мен бүлінбей сақталуы барлығы дерлік қайта сүзгіден өткізіліп, мемлекеттік тізімге ілікпей қалған мәдени мұраларымыз комиссия шешімімен арнайы мемлекеттік тізімге алынатын болады. Қазіргі кезде 34 архитектуралық ескерткіш, Шелек ауылындағы тарихи-өлкетану музейі, 200 археологиялық ескерткіш мемлекеттік тізіміне алынған болса, қалған 84 археологиялық ескерткіш алдын-ала тізімде тұр. Былтырғы жылы мемлекеттік тізімге ұсынылмай қалған 68 архитектуралық ескерткішке жергілікті қала және ауылдық округ әкімдерімен төлқұжаттары жасалынып, облыстық комиссияға ұсынылған болатын. Алдағы уақытта барлау нәтижесі негізінде ұсынылған ескерткіштердің жай-күйі нақтыланып, мемлекет қорғауына алынуы тиіс ескерткіштер қайта іріктелінетін болады. Қазіргі уақытта Алматы облыстық тарихи-мәдени мұраны қорғау орталығының қала құрылысы ескерткіштерін қорғау бөлімінің меңгерушісі Серік Оңғарбаев мен тарихи-мәдени мұраларды қорғау бөлімінің меңгерушісі Жандос Адамжанов бастаған топ ауданымыздың мәдениет және тілдерді дамыту бөлімі мамандарымен бірлесе отырып, ескерткіштер орналасқан барлық елді-мекендерді қала және ауылдық округтің ескерткіштерге жауапты мамандарымен аралап, сараптама жүргізу үстінде. Барлау барысында анықталған жаңадан табылған археологиялық мұралар есепке алынып, оларды жоюдан, бүлінуден қорғау мақсатында кешенді түрде іс-шараларды жүргізу қолға алынатын болады.
Балауса Шарғынова,
мәдениет және тілдерді дамыту
бөлімінің бас маманы.
