Елімізде төртінші жыл қатарынан жастар корпусын дамыту жобасы – «Zhasproject» жұмыс істеп келеді. Жоба мақсаты – осал топтағы жастардың әлеуметтік жобасына қайтарымсыз грант беріп, іске асыру барысында қолдау көрсету.

Биыл «Zhasproject» жобасы еліміздің екі өңірде іске асырылды. Олар: Қарағанды және Алматы облысы. Қазіргі таңда Алматы облысы, Еңбекшіқазақ ауданында 65 781  жас бар. Жастар корпусын дамыту жобасынан 58 әлеуметтік жобаға жастарымыз қол жеткізді. Жобалар көбінесе наубайхана, сұлулық салондары, тігін шеберханалары саласында ашылды. Өзіміздің ауданның С.Мұрал, А.Оспанбаева, А.Мүнкебаев, Ж.Елеулова, Ә.Мағжан сынды жастары әрқайсысы 1 млн. теңге көлемінде грантқа ие болып, түрлі салада әлеуметтік жобасын жасап жүр.

Сая Мұрал, «Сұлулық территориясы» Нұр сұлу әлеуметтік жобасының лидері:

- Ауылымызда керемет салон ашылды. Ауыл тұрғындары енді шаш алдыру үшін орталыққа барып қиналмайтын болды. Алғашқы транш түскенде заттарымыз толық алынбады. Екінші транш түскен бетте толыққанды жұмысымызды бастай алдық. Ауылдағы ақсақалдар мен зейнеткерлер тегін қызметке дән ризашылығын білдірді. Үйде отырған аналарымыз тырнағын тегін боятып, шаштарын әрлете алды. Жобамызда алғашында адамдар аз еді. Уақыт өте келе айына 50-ден аса адамға шаштараз қызметін ұсынатын болдық. Болашақта жұмысымызды одан әрі жалғастырамыз деген ойдамын.

Гүлжайна Рахманова, «Кәсіби шаштараз оқыту орталығы» жобасының лидері:

- Жобамның негізгі мақсаты – жастар арасындағы жұмыссыздық деңгейін азайту. Осы бағытта менің жобам жүзеге асатын Есік қаласында қазіргі уақытта 169 жұмыссыз жас болса, оның ішінде мүмкіндігі шектеулі 48 азамат бар.  Біздің жобамыздың ішінде арнайы оқыту курсынан өтіп, тиісті дипломын алған мастер Асылхан Мункебаев бар. Осы жігіттің көмегімен жоба аясында Есік қаласындағы мүмкіндігі шектеулі балаларға, көпбалалы отбасынан шыққан, толық емес және жұмыссыз жастарға, шартты жазасын өтеп келген азаматтарға шаш қиюдың қыр-сырын үйретті. Жоба аяқталғанға дейін қызметті толық үйретіп, тұрақты жұмыс табуына көмегімізді тигіземіз деп сенемін. 

Ә.Мағжан, әлеуметтік сұлулық салоны:

- Біздің жобамыз мүмкіндігі шектеулі, жартылай жетім және жұмыссыз жастарға сұлулық салонының қыр-сырын үйрету мақсатында ашылды. Біз тұратын Бөлек ауылында 1206 жас бар. Онын ішінде жұмыссыздар – 213, мүмкіндігі шектеулі жандар – 17, сонымен қатар жетім, 15жартылай жетім жас бар. Жобаны іске асыру барысында студенттер тегін бет әрлеуді, тырнақ, кірпік жалғауды, шаш әрлеуді, тағы басқа да сұлулық  салоны қызметтерін үйренді. Менің мақсатым – қолынан іс келетін әрбір азамат еңбекке араласып, болашақта өз кәсібін ашса деймін.

Салтанат ӘШІРБАЙ,

«Zhasproject» жобасының баспасөз хашысы