Хиджама — бұл ағзадан лас қанды шығару арқылы емдейтін дәстүрлі емес емдеу әдісі. Бұл әдіс тері қабатын бұзып, терінің үстінен пышақпен кішкене тіліктер жасап, арнайы вакуумды банка арқылы қан алу негізінде жүзеге асады.
Хиджама кезіндегі стерильдік – кез келген білікті маманның №1 ережесі.
Хиджама жасағанда мыналарды талап етіңіз:
- Тек таза және әр клиентке жеке қолданылатын банкілерді, стерильді бір реттік пышақтарды, инелі балғаларды қолдануын;
- Тері қабатының бүтіндігін бұзатын манипуляцияларда бір реттік стерильді қолғаптарды пайдалануын;
- Жеке қорғаныс құралдарының (көзілдірік, алжапқыш, бетперде және т.б.) таза болуын;
- Қол жууға арналған жағдайлардың болуын (ыстық және суық суы бар жуғыш раковина, сұйық сабын, антисептик, қағаз сүлгілер немесе электрлік қол кептіргіш);
- Бөлмені желдетуге арналған мүмкіндіктердің болуын.
Хиджама процедурасынан кейінгі ең қауіпті салдардың бірі — инфекция жұқтыру қаупі.
Бұл ВИЧ, В және С, D гепатиті және басқа да жұқпалы аурулардың берілуіне әкелуі мүмкін. «Хиджама жасаймын» деп қызмет ұсынатын емшілердің барлығында бір реттік банкілердің жеткілікті саны бола бермейді. Сондықтан олар банкілерді қайта қолдануға мәжбүр болады. Дәл осылай, теріні тіліп, қан шығаруға қолданылатын пышақтар да қайта пайдаланылуы мүмкін.
Хиджаманың қауіпсіздігі – өз клиентінің денсаулығына және өз абыройына мән беретін нағыз маманның басты қағидасы.
Еңбекшіқазақ аудандық санитариялық-эпидемиологиялық бақылау басқармасы басшысының орынбасары Д.Бақберген
