Бүгінгі күні Қазақстанның агроөнеркәсіп кешенінің алдына қойылған міндет көп. Соның бірі – ауыл шаруашылық өндірісін тұрақты дамыту, әлемдік нарықта бәсекеге қабілетті және экспортқа бағытталған өнімдер өндірісін ұлғайту, елдің азық-түлік қауіпсіздігін қамтамасыз ету және 2022 жылы осы саладағы еңбек өнімділігін 2,5 есе арттыру. Агроөнеркәсіп аудан эконмикасының да қозғаушы күші саналады. Күні кеше ғана ел Президенті Қасым-Жомарт Тоқаев ауыл шаруашылығын ел экономикасының тірегіне айналуы керек екендігін айтты. Мемлекет басшысының бұл бастамасы аталған саланың дамуына тыңнан серпін беретіні анық.
Мен Дастан Баулықов, Ақши ауылдық округінде 2016 жылдан бері мал өсірумен айналысып келемін.Алты жылғы берекелі еңбектің арқасында бүгінде шаруа қожалығындағы қой санын 900 тұяққа, ірі қараны 300 басқа жеткіздім. Әрине, өз ісімді өркендетуге мемлекеттік қолдау мол мүмкіндік берді. Ал ел Президенті Қасым-Жомарт Тоқаевтың ауыл шаруашылығын жаңаша бағытта өркендету бастамасын барынша қолдаймын. Елімізде ауыл шаруашылығы дамып келе жатыр, болашақта көп реформалар бізді күтүде, оның ішінде аталған салаға қатысты мемлекеттен берілетін түрлі субсидияларға өзгерістер енгізіліп, зор қолдаулар жасалады деп ойлаймын. Ауыл шаруашылығына қатысты бұрыннан келе жатқан өзекті проблемалар бар. Соның бірі – ірі қара және ұсақ малды асылдандыру, ұрықтандыру мәселесі. Мемлекет басшысы Қасым-Жомарт Тоқаев бұл түйінге арнайы тоқталып өтті. Яғни мал тұқымын асылдандыруға берілетін субсидия ашық әрі әділ түрде берілуі керектігін жіті айтты. Біз ашықтықты қамтамасыз етуіміз керек. Әрине үкіметтің қолдауынсыз ауыл шаруашылығының өркендеу мүмкін емес. Сондықтан осы өзгерістер жаңа дем береді.
Елімізде өсімдік және мал шаруашылығын дамыту, ауыл шаруашылығында кәсіпкерлікті қолдау, ауыл шаруашылығы өнімдерін сақтау және қайта өңдеу бойынша несиелеу бағдарламары мен аталған саланың тамырына қан жүгірту үшін субсидияландыру түрлері қабылданған болатын. Енді осы бағдарламаларды жетілдіріп, түрлі өзгерістер енгізу қажет. Қазіргі кезде ірі және орта шаруашылықтарға мемлекеттің көмегі қол жетімді ал одан кіші шаруашылықтарға және үй шаруашылығына да көңіл бөлу қажет. Өйткені ауылда өз үйінде малын бағып отырған жандар көп, оларға субсидиялар қолжетімді болса, бір жағынан ауыл тұрғындарының тұрмыстық деңгейіне ықпал етсе, енді бір жағынан ауыл шаруашылығына да оң әсерін тигізбек. Мысалы, былтыр ауыл шаруашылығын субсидиялауға 72 млрд теңге қаражат бөлінген, бірақ оны көбінесе ірі шаруашылық қожалық иелеріне берілген. Әрине, осы орайда ұсақ шаруашылықтар да назардан тыс қалмауы керек.
«Мемлекет басшысы үндеуінде «соңғы жылдары елімізде қуаңшылық болды, болжам бойынша биыл да ахуал күрделене түсуі мүмкін», деді. Сала мамандары да елдегі жауын-шашын мен қардың түсу мөлшерін қадағалап, осы ойға келіп отыр. Суармалы су аздығы, жайылымның тозуы сынды табиғи факторлар ауыл шаруашылығының дамуына тұсау салып отыр. Алда бұл мәселелер зерттеліп, оң шешімін табады деген ойдамын. Меніңше Мемлекет басшысы берген тапсырмалар жүйелі атқарылса, еліміздің ауыл шаруашылық саласы бәсекеге қабілетті бола түсетіндігіне сенімдімін.
Дастан БАУЛЫҚОВ,
«Агро Дос» шаруақожалығының иесі.
