Қазақстан Республикасы Президентінің кеңесшісі Мәлік Нұржанұлы жұмыс сапары аясында  аудан орталығында тұрғындармен кездесіп, емен-жарқын пікірлесті. Іс-шараға аудан әкімі Талғат Байеділов, ішкі саясат бөлімінің  басшысы Дархан Ахметов және ақсақалдар қауымы  мен ардагерлер қатысты. Кездесуде сөз алған Мәлік Нұржанұлы мемлекеттік саясат туралы айтты.

 – Мемлекет басшысы Қасым-Жомарт Тоқаев ел бірлігін, халықтың бейбіт заманда өмір сүруін басты назарға алды.  Әлемдік ахуал біздің елді сырт айналып өтпесі анық. Яғни әлемдегі жағдай біздің экономикамызға, саясатымызға әсер етері анық.  Соңғы екі айда Мемлекет басшысы 25 елдің Президентімен кездесті. Бұл кездесулердің басты мақсаты – ел қауіпсіздігін сақтау, елдің сыртқы саясатын, сауда-экономикалық байланыстарды нығайта түсу. Халық – біз, мемлекет біздікі болғандықтан, Отанымызға  деген жауапкершілікті  мойнымызға аламыз. Бүгінгі кездесуде сіздердің пікірлеріңізді тыңдап, қоғам шіндегі жағдайды біліп,  алдағы уақытта халық мәселесі бойынша жұмыс жасаймыз, – деді Президент кеңесшісі Мәлік Нұржанұлы.

Кездесуге жиналған жұртшылық аудан ішіндегі қолайсыз жағдайларды ортаға салды.  Кейбір ауылдарда әлеуметтік нысандар бой көтерсе, жұмыс орындары ашылып, әсіресе, жастар жұмыспен қамтылып, ауыл жұртының әл-ауқатын жақсарту  мақса-тында бағдарламалар қолға алынса деген өтініштерін жеткізді. Сонымен қатар медицина саласына назарылықтарын білдірді. Аудандық ардагерлер кеңесінің төрағасы Тілеулес Ұзақов  өңірлік туризімді  дамыту, ауыл шаруашылығына қатысты маман тап-шылығын шешу, мемлекеттік сатып алу саласындағы келеңсіздіктерді алдын алу сынды өзекті мәселелерді айтып өтті. Ақсақалдар қауымы қазіргі жаһандану дәуірінде саналы ұрпақ тәрбиелеу, жастарды кітап оқуға ынталандыру, қоғамдық сананы дамыту бағытындағы ойларын  жеткізді. Заман талабына сай жастардың білімдерін шыңдау мәселесін көтерді. Жиын соңында Мәлік Нұржанұлы әрбір айтылған мәселеге мән беріп, шешілу жолдарын қарастырып, Мемлекет басшысына жеткізуге уәде етті.

Айерке МЕРЕКЕҚЫЗЫ.