Еңбекшіқазақ ауданында мемлекеттік әлеуметтік тапсырыс аясында “Отбасылық және гендерлік саясат тұжырымдамасын іске асыру аясында отбасы құндылықтарын дәріптеу” тақырыбында бірқатар маңызды кездесулер өтті. Іс-шаралар аудандық ішкі саясат бөлімінің қолдауымен және “Іле мұрагер” қоғамдық бірлестігінің ұйымдастыруымен жүзеге асырылды.
Аталған жоба аясында Есік қаласы, Саймасай, Ават, Бәйтерек және Рахат ауылдық округтерінде өткізілген кездесулерге тұрғындар кеңінен қатысып, отбасылық құндылықтарды сақтау және дамыту мәселелері, тұрмыстық зорлық-зомбылықтың алдын алу, құқықтық сауаттылықты арттыру, сондай-ақ гендерлік теңдік принциптерін қоғамға кеңінен насихаттау тақырыптары талқыланды.
Сарапшылар ретінде педагогика ғылымдарының магистрі, аға оқытушы, докторант Таипова Зульфия Масимжановна және полиция аға лейтенанты, отбасылық-тұрмыстық зорлық-зомбылықпен күрес инспекторы Айтуова Медина Есимовна шақырылды. Олар отбасы тәрбиесінің маңыздылығы, ата-ананың балаға деген жауапкершілігі, құқықтық білімнің қажеттілігі, сондай-ақ тұрмыстық зорлық-зомбылыққа қарсы күрес жолдары жөнінде жан-жақты және нақты ақпарат берді.
Кездесулер ашық форматта өтіп, тұрғындар өздерін толғандырған сұрақтарды қойып, тәжірибелі мамандардан практикалық кеңестер алды. Бұл мүмкіндік қатысушыларға отбасы ішіндегі түсіністікті арттыруға, құқықтық сауаттылық пен қоғамдық сананы көтеруге септігін тигізді.
Осы шара барысында арнайы ақпараттық-түсіндіру материалдары таратылды. Бұл басылымдар отбасылық өмірде туындайтын түрлі мәселелерді шешуге бағытталған нақты нұсқаулықтарды қамтиды. Құжаттар қоғамдағы зорлық-зомбылықты болдырмау, отбасы құндылықтарын насихаттау және гендерлік теңдікті қамтамасыз ету мәселелерін кеңінен түсіндіруде маңызды рөл атқарады.
Аталған кездесулердің өткізілуі аудан тұрғындарының отбасы институтына деген құрметін арттырып, саналы және сауатты ұрпақ тәрбиелеуге деген ұмтылысты күшейтті. Мұндай шаралар қоғамдағы тұрақтылық пен бейбіт өмір салтын қалыптастыруға, зорлық-зомбылықсыз орта құруға бағытталған маңызды қадам болып табылады.
