Халықаралық ескерткіштер мен тарихи орындар күні 1984 жылдан бастап жыл сайын 18 сәуір күні атап өтіледі. Мерекеге орай «Есік» мемлекеттік тарихи-мәдени музей-қорығында дәстүрлі мерекелік іс-шара ұйымдастырылды.

Шара шымылдығы «Есік» музей-қорығының директоры Гүлмира Райылқызының құттықтау сөзімен түрілді. Іс-шара қонақтары ауданымызға белгілі Ерқуат Оңашқан мен Қожан Нұркелді сынды ақындардың айтысына куә болып, Алтай Үсеновтің «Алтын адам» атты шығармасын тыңдады. Ғұмарбек Даукеев атындағы Алматы энергетика және байланыс университетінің студенттері «Балбырауын», «Адай» күйлерін шертіп, биші қыздар өз өнерлерлерін ортаға салды. Сонымен қатар студенттер арасында ақиық ақын М.Мақатаевтың шығармаларынан үзінді оқыған өнерпаздарда болды.

Мерекелік шараның жалғасы саятшы Нұрасылхан Сейітханұлының құсбегілік өнерімен және Байдаралы отбасының  қазақ халқының «Бес қару» жауынгерлік өнеріндегі садақ ату, найза, қылыш, айбалта және пышақ сынды қаруларды қарсыласына сермеу, қолдану әдістерін көрсетумен жалғасты.

Сондай-ақ студенттерге арнайы квест ойыны ұйымдастырылып, мерекелік шарада музей-қорықпен жыл бойы белсенді әріптестік танытқан туризм саласындағы гид-экскурсоводтарына, музей демеушілері мен құрметті қонақтарына алғыс хат пен екінші бесжылдық 2015-2020 жалдырдағы есеп-альбомы сыйға берілді

Жыл сайынғы дәстүр бойынша «Атадан мал қалғанша тал қалсын» деп, жеке кәсіпкер Нұрлан Көкеновің демеушілігімен музей-қорық ауласына ағаш отырғызылып, қанақтарға мерекелік Наурыз-дәм ұсынылды.

Аталмыш іс-шара соңында қорық-музей қызметкерлері мен қонақтары студенттердің қорғандар арасында көрсеткен флешмоб биін тамашалап, естелік суретке түсті.

 Ә.АМАРГАЗИЕВА,

«Есік» музей-қорығының қызметкері.