Егемендікке қол жеткізген ширек ғасырдан астам уақытта елімізде аз жұмыстар атқарылған жоқ. Елбасы, Nur Otan партиясының төрағасы Нұрсұлтан Назарбаевтың жетекшігімен Қазақстан дамудың жаңа сатысына көтеріліп, халықтың әл-ауқаты арта түсті. Бұл бағыттағы кешенді жұмыстар жалғасуда.

Бәсекелестік дамыған күрделі кезеңде жұртшылықтың сенімін ақтап, мойынға артылған жүкке жауапкершілікпен қарау – мен үшін аса маңызды. Сондықтан, сайлаушылардың маған артқан сеніміне селкеу түсірмеймін. Депутат деген маңызды мандатқа ие болсам, мынадай бағыттарда жұмыс жасаймын:

1. Көптеген ауылдарда мектеп, амбулатория мен фельдшерлік пунктердің сапасы сын көтермейді. Апатты жағдайдағы ғимараттар да жоқ емес. Осындай нысандарды жаңартып, ауылдарда жаңа білім ошақтары мен денсаулық сақтау мекемесінің бой көтеруіне атсалысамын. Сонымен қатар, оларды жаңа, заман талабына сай құралдармен жабдықтау менің сайлауалды бағдарламамның негізі.
2. Халықтың әлеуетін арттыру да мен үшін үлкен міндет болмақ. Жаңа жұмыс орындарын ашып, жұмыссыздықпен күресу жолында барымды саламын. Көпбалалы аналар мен әлеуметтік аз қамтылған отбасыларының жағдайын жақсартуға атсалысамын.
3. Цифрландыру мәселесі де күн тәртібінде тұр. Елімізде карантиндік шаралар күшейтілгелі оқушылар қашықтан білім алып, интернет арқылы оқуға мәжбүр болды. Әлі күнге шалғай мекендерде интернет тұрмақ, телефон байланысының өзі өзекті проблемаға айналып отыр. Осы мәселелерді шешу жолында, ауыл тұрғындарының сапалы әрі жылдам интернетке қол жеткізуін қамтамасыз ету бағытында аянбай тер төгемін.
4. Конфессияаралық татулық – еліміздегі тұрақтылық пен дамудың кепілі. Сондықтан да, 50-ден астам этнос өкілдері тұратын ауданымызда олардың салт-дәстүрін дәріптеуге, ана тілін дамытып, ұлтаралық татулықты сақтау жолында қызмет етемін.
5. Дамуға бағыт алған елімізді артқа тартатын жең ұшынан жалғасқан сыбайлас жемқорлықпен күресуге бар күш-жігерімді саламын. Барлық салалардағы жемқорлық әрекеттеріне жол бермей, жемқорлықтың ел тәуелсіздігіне сызат түсіретіндігін тұрғындар санасына сіңіру жолында еңбек етемін.

Соңғы 15 жылда менің басқаруымдағы «Киікбай» құрылыс компаниясы ауылдағы су тапшылығының мәселесін шешуге атсалысты. Бүгінгі күнге дейін 31 ауылға су құбырын жүргіздік. Заман талабына сай 5 мектеп пен 3 медициналық мекеме, спорт кешендерін салдық. Осы бағыттағы жұмыстар менің бағдарламамның негізі болмақ.

Мен киелі Жетісу жерінде дүниеге келіп, осы жерде өсіп-өндім. Туған өлкемнің шешімін таппай тұрған мәселелері мен түйінді проблемалары маған таныс. Егер маған қолдау білдіріп, дауыс берсеңіздер олардың шешу жолдарын қарастырып, тұрғындардың әлеуеттін арттыруға барымды саламын. Тәуелсіздік тұғырын бекем етіп, еліміздің әлеуметтік-экономикалық ахуалын жақсарту жолында талмай тер төгіп, Қазақстанды бірге көркейтейік.

Өмірбаяны

Мен Кунесов Қияс Жапарбекұлы 1965 жылы Еңбекшіқазақ ауданы Тескенсу ауылында дүниеге келдім. 1982 жылы Есік қаласындағы А.Мәлкеев атындағы мектеп-интернатты бітірдім. Сол жылдан бастап еңбекке араласып, Алматы қаласында құрылыс мекемелерінде жұмыс істедім. 1984 жылы әскер қатарына шақырылып, Отан алдындағы борышымды өтедім. 1987 жылы Қазақ Политехникалық институтына түсіп, инженер-гидрогеолог мамандығын алдым. 1992 жылдан 2006 жылға дейін Шамалған станциясындағы астық комбинатында еңбек еттім. 2006 жылдан бастап «Киікбай» ЖШС-ін құрып, бүгінде осы мекеменің бас директоры, құрылтайшысымын. «ҚР құрметті құрылысшысы» атағының иегерімін.

Үйленгенмін, 4 балам бар.