Өмірбаяны

Мен Надырбаев Серик Дюсебайұлы Алматы облысы Еңбекшіқазақ ауданы Алға ауылында 1968 жылдың 5 қарашасында көпбалалы отбасында дүниеге келдім. Білімім жоғары: 1984 жылы Алға ауылындағы орта мектепті тәмамдап, осы жылы Есік қаласындағы педагогика училищесіне оқуға түсіп, 1987 жылы тәмамдадым. 1987-1989 жылдар аралығында Отан алдындағы борышымды өтеп әскер қатарында қызмет еттім. 2001-2004 жылдар аралығында Қазақтың спорт және туризм академиясында оқып, жоғарғы білім алдым. Сондай-ақ, 2014-2017 жылдары аралығында Д.А. Қонаев атындағы көлік және құқық Гуманитарлық Университетінде білім алып, экономика ғылымдарының магистрі академиялық дәрежесін алдым.

Алғашқы еңбек жолым Еңбекшіқазақ ауданы Алға орта мектебінің мұғалімі болып басталды. Алға орта мектебінің директоры, аудандық білім бөлімінің әдіскері, 2015 жылдан бері аудандық білім қызметкерлері кәсіподағының төрағасы болып қызмет атқарамын.

 Отбасым бар, екі баланың әкесімін.

Менің сайлау алдындағы бағдарламам:

• Мұғалімдердің денсаулығының мықты, жайдары көңіл-күйі басты назарда болу керек деп санаймын. Осыған байланысты жаз мерзімінде ұстаздар мен олардың балаларын сауықтыру, шипажайлық-курорттық емдеу басты мәселе болып табылады. Әрине, бұл жұмыс бар, бірақ мен осындай демалыс жолдамаларының артуын басты назарға қойсам деймін, әрі жолдаманың құны қалта көтеретін, емі талапқа сай мекемеде сауықтыруды қадағалаймын.
• Мұғалім мамандығының абыройын көтеру – лайықты еңбекақымен қамтамасыз ету. Ұстаздықтың қыр-сырын өз басымнан өткізгендіктен «білемін» деп толық айта аламын. Педагогтерді материалдық тұрғыдан қамтамасыз ету – бұл мемлекет алдындағы басты міндет. Олай болса, осы мәселенің жылдам шешілуіне барынша атсалысамын
• Ұстаздардың «Рухани жаңғыру» рухани-адамгершілік тәрбиесі негізінде жасалған бағдарлама шеңберінде шеберлігін арттыру мақсатында бүгінгі күнгі жағдайды ескере отырып, сандық форматта түрлі кәсіби байқаулар ұйымдастыруды ұсынамын. Бұл педагогтердің мотивациясын арттырып, шығармашылықтарын шыңдап, қазақстандық қоғамда ұстаз мәртебесін дамытады деп сенемін.
• Саламатты ұрпақ тәрбиелеу үшін дене шынықтыру мен спортқа, спорт алаңдары мен денсаулық үнемдеуші мәдениетке баса назар аудару керек. Сол мақсатта балалар мен үлкендерге арналған аула клубтары мен ақысыз спорт секцияларын қайта жандандыруды қолға алуды ұсынамын.
• Мектепке жас мамандардың келуі, олардың сол жерде тұрақталып қалуы – бүгінгі күннің басты мәселесі. Осыған байланысты, мен жас мамандарға қолдау көрсетіп, баспаналы болуына атсалысамын.
• Еліміздің демографиясының көтерілгеніне қарай бала саны көбейді. Бұл әрине, қуаныш. Осыған орай сол балаларға арналған балабақшалар мен мектептердің көптеп салынуын қадағалағым келеді.
• Ұстаз еңбегі, ең алдымен, ой еңбегі болғандықтан «Мұғалімді зейнетке ерте шығаруды» ұсынамын, онымен бірге қызмет еткен жылдарына байланысты белгілі бір пайыз мөлшерінде зейнетақысына үстеме қосылғанын қалар едім.
• Мұғалім мәртебесін көтеріп, мектептегі негізгі міндетінен тыс жұмысқа жегуге тосқауыл қоюды қадағалаймын.

Аудандық мәслихатқа депутаттыққа кандидат ретінде, өз сайлаушыларыма осы мәселелердің барлығының орындалуына бар күшімді саламын деп уәде беремін.

Ауданымыздың әл-ауқатын көтеріп, одан әрі өсіп-өркендеуі үшін бар күш-жігерімді арнаймын. Менің сайлауалды бағдарламамды қолдап, маған дауыс беріңіздер.